އިންސާނިއްޔަތާއި ޚިލާފު އަމަލުތަކެއް ހިންގިކަމަށް ތުހުމަތުކޮށް، ބަންގްލަދޭޝް އަސްކަރިއްޔާގެ ކުރިއާއި މިހާރުގެ ބައެއް އިސް ވެރިން ހައްޔަރުކޮށްފިއެވެ.

ބަންގްލަދޭޝް އަސްކަރިއްޔާގެ ބެލުމުގެ ދަށުން ހައްޔަރުކުރީ ރިޓަޔަރޑް ބައެއް އޮފިސަރުންވެސް ހިމެނޭހެން 15 މީހެކެވެ. މި އޮފިސަރުން ހައްޔަރުކުރުމުގެ ކުރިން، އޮކްޓޯބަރ 8 ވަނަ ދުވަހު ބަންގްލަދޭޝްއިން ގާއިމްކޮށްފައިވާ އިންޓަނޭޝަނަލް ކްރައިމްސް ޓްރައިބިއުނަލްއިން ވަނީ ކުރީގެ ބޮޑުވަޒީރު ޝައިޚް ހަސީނާ ހިމެނޭހެން 30 މީހަކު ހައްޔަރުކުރުމަށް އަމުރު ނެރެފައެވެ. މި މީހުންގެ މައްޗަށް ތުހުމަތުކުރެވެނީ ޝައިޚް ހަސީނާގެ އަވާމީ ލީގުގެ ވެރިކަމުގައި އިންސާނިއްޔަތާއި ޚިލާފު އަމުލުތަކެއް ހިންގުމާއި، ގަދަކަމުން މީހުން ގެއްލުވާލުމުގެ ކުށެވެ.

3 މެމްބަރުންގެ މައްޗަށް އެކުލެވޭ ޓްރައިބިއުނަލްއިން ނެރެފައިވާ އަމުރުގައިވަނީ މިމަހުގެ 22 ވަނަ ދުވަހާއި ހަމަޔަށް އެ އެންމެން ހައްޔަރުކޮށްގެން ޓްރައިބުނަލަށް ހާޒިރުކުރުމަށެވެ. ހައްޔަރުކުރުމުގެ އަމުރު ނެރެފައިވާ މީހުންނަކީ ޝައިޚް ހަސީނާގެ އިތުރުން ކުރީގެ ދާޚިލީ ވަޒީރު އަސަދުއްޒަމާން ޚާން، ހަސީނާގެ ދިފާޢީ މުޝީރު ރިޓަޔަރޑް މޭޖަރ ޖެނެރަލް ތާރިޤް އަހްމަދު ސިއްދީޤް އަދި ފުލުހުންގެ ކުރީގެ ވެރިޔާ ބޭނަޒީރު އަހްމަދެވެ. ބާކީ 27 މީހުންނަކީ ސިފައިންގެ އޮފިސަރުންނެވެ.