ބްރާސްފަތި ދުވަހާ ހަމަޔަށް މޫސުން ގޯސްވާނެ: މެޓް
މިއަދުން ފެށިގެން މިހަފްތާގެ ބްރާސްފަތި ދުވަހާ ހަމަޔަށް މޫސުން ގޯސްވާނޭކަމަށް މޫސުމާ ބެހޭ ޤައުމީ އިދާރާއިން ލަފާކޮށްފިއެވެ.
މޯލްޑިވްސް މީޓިއޮލޮޖިކަލް ސެންޓަރުން ބުނީ، މިމަހުގެ 17 ވަނަ ދުވަހާ ހަމަޔަށް ރާއްޖެ ސަރަހައްދަށް ހުޅަނގު މޫސުމުގެ ބާރުގަދަވާނޭކަމަށެވެ. އެގޮތުން ހާއްސަ ގޮތެއްގައި ދެކުނާއި މެދުރާއްޖެތެރޭ ހިމެނޭ ސަރަހައްދަށް ވައި ބާރުވެ، ކަނޑުތައް ގަދަ ވެ ވިއްސާރަ ކުރާނޭކަމަށް ވަނީ ލަފާކޮށްފައެވެ. މީގެ އިތުރުން ދިޔަވަރު ބޮޑުވާ ގަޑިތަކުގައި އުދަ އަރާފާނޭކަމަށް ސަމާލުވުމަށްވެސް މެޓުން އިލްތިމާސްކުރެއެވެ.
މެޓުން ބުނީ މިދުވަސްތަކުގައި މޫސުން ގޯސްވާނޭކަމަށް ލަފާކުރެވޭތީވެ، އެންމެން، އަދި ހާއްސަކޮށް ކަނޑުދަތުރުވެރިން މޫސުމާ ބެހޭ އެންމެ ފަހުގެ މައުލޫމާތު ހޯދުމަށްފަހު ދަތުރުކުރުމަށް ސަމާލުވާންޖެހޭ ކަމަށެވެ.
ކުރިއަށް އޮތް ދުވަސްތަކުގައި މޫސުމަށް ސަމާލުވުމަށް މެޓް އޮފީހުން އިލްތިމާސްކޮށްފައިވާއިރު، އަލިހުރަސްކަނޑަށް އިއްޔެ ދޯންޏެއް އަޑިއަށްގޮސް ދޯނީގެ ބައެއް ބައިތަކާއި ބައެއް އެހެނިހެން ތަކެތި އޮޔާދާތީވެ އެ ސަރަހައްދުން ދަތުރުކުރާ ފަރާތްތަކުން ސަމާލުވުމަށް ކޯސްޓުގާޑުން ވަނީ އިލްތިމާސްކޮށްފައެވެ.
Advertisement
This content is created and paid for by advertisers and does not involve Voice Journalists
