ވިއްސާރަނަމަވެސް ރައީސް ށ.އަތޮޅަށް ފުރާވަޑައިގަންނަވައިފި
މޫސުން ގޯސްކޮށް އޮތްނަމަވެސް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ށ.އަތޮޅުގެ ރަށްތަކަށް ކުރައްވާ ދަތުރުފުޅެއްގައި މިއަދު އެއަތޮޅަށް ފުރާވަޑައިގަންނަވައިފިއެވެ.
ރައީސް ޑރ.މުހައްމަދު މުއިއްޒުގެ މި ދަތުރުފުޅުގައި އެއަތޮޅުގެ މީހުން ދިރިއުޅޭ 14 ރަށަކަށް ވަޑައިގަތުމަށް ވަނީ ތާވަލުކުރެވިފައެވެ. އޭގެ ތެރޭގައި ހިމެނެނީ ކަނޑިތީމު، ނޫމަރާ، ގޮއިދޫ، ފޭދޫ، ފީވައް، ބިލެތްފަހި، ފޯކައިދޫ، މިލަންދޫ، ނަރުދޫ، މަރޮށި، ޅައިމަގު، ފުނަދޫ، ކޮމަންޑޫގެ އިތުރުން މާއުނގޫދޫ އެވެ.
ރައީސް ޑރ.މުއިއްޒުގެ މި ދަތުރުފުޅަކީ ށ.އަތޮޅުގެ މީހުން ދިރިއުޅުއްވާ ރަށްތަކަށް ވަޑައިގެން އެތަތޮޅުގެ ރައްޔިތުންނާއި ކައުންސިލްތަކާއި، އަންހެނުންގެ ތަރައްޤިއަށް މަސައްކަތްކުރައްވާ ކޮމީޓީތަކާ ބައްދަލުކޮށް ރަށްރަށުގެ ތަރައްޤިއާ ގުޅުންހުރި ކަންކަމާއި ރައްޔިތުން ބޭނުންވާ ކަންކަމާ ގުޅޭ މައުލޫމާތު ހޯއްދަވައި މަޝްވަރާކުރުމުގެ ބޭނުމުގައި ކުރައްވާ ދަތުރުފުޅެކެވެ.
ރައީސްގެ މި ދަތުރުފުޅުގެ ތެރެއިން އެއަތޮޅުގެ ރަށްތަކުގައި ކުރިއަށްގެންދިޔަ މަޝްރޫޢުތަކުގެ ނިމުން ފާހަގަކުރުމުގެ އިތުރުން ކުރިއަށް ރޭވިފައި ހުރި މަޝްރޫޢުތައް ހިއްސާކުރުމާއި، ބައެއް މަޝްރޫޢުތަކުގެ އަމަލީ މަސައްކަތުގެ ފެށުން އިފްތިތާހުކުރުން އޮންނާނޭކަމަށް މައުލޫމާތު ލިބެއެވެ.
ރައީސް ޑރ.މުހައްމަދު އެންމެފަހުން ވަޑައިގަންނަވާފައިވަނީ އދ.އަތޮޅުގެ ރަށްތަކަށެވެ. މި ދަތުރުފުޅުގައި އެއަތޮޅު ރަށްތަކުގެ ރައްޔިތުންނާ ބައްދަލުކުރައްވައި ރައްޔިތުން ބޭނުންވާ ކަންކަމުގެ މައުލޫމާޤތު ވަނީ ހޯއްދަވާފައެވެ.
Advertisement
This content is created and paid for by advertisers and does not involve Voice Journalists
