މިފްކޯއިން މަސްކިރުވި 276 ދޯންޏަކަށް މިދިޔަ ހަފުތާގައި 9.5 މިލިއަން ރުފިޔާ ދޫކޮށްފައިވާ ކަމަށް އެ ކުންފުނީގެ ހިސާބުތަކުން ދައްކައިފިއެވެ.

މިފްކޯގެ ހިސާބުތަކުން ދައްކާ ގޮތުން، މިދިޔަ ހަފުތާގައި އެ ކުންފުންޏަށް ވިއްކި 276 ދޯންޏަކީ އޭގެ ކުރީގެ ހަފުތާގައި މިފްކޯއަށް ވިއްކި  235 ދޯންޏަށް ވުރެ 17.4 އިންސައްތަ އިތުރު އަދަދެކެވެ. ދޯނިތަކުގެ އަދަދު އިތުރުވި ނަމަވެސް މިދިޔަ ހަފުތާއަށް ވުރެ އޭގެ ކުރީގެ ހަފުތާގައި މަސްވެރިންނަށް ދޫކުރި އަދަދު ވަނީ 3 އިންސައްތަ އިތުރުވެފައެވެ.

އެގޮތުން އެގޮތުން މިދިޔަ ހަފްތާގައި މަސްވެރިންނަށް މުޅި ޖުމްލަ 9،543،442 ރުފިޔާ ވަނީ ދޫކޮށްފައިވާއިރު،  އޭގެ ކުރީ ހަފްތާގައި މަސްވެރިންނަށް ދޫކޮށްފައިވަނީ 9،843،469 ރުފިޔާއެވެ.

އެ ހިސާބުތަކުން ދައްކާ ގޮތުން މިދިޔަ ހަފުތާގެ ހޮނިހިރު ދުވަހު 53 ދޯންޏަށްކަށް މިފްކޯއިން ވަނީ 2.16 މިލިއަން ރުފިޔާ ދޫކޮށްފައެވެ. އެއީ އެ ހަފުތާގައި އެންމެ ގިނަ އަދަދަކަށް ފައިސާ ދޫކުރި ދުވަހެވެ.

މިފްކޯ އިން 48 ގަޑިއިރުގެ ތެރޭގައި ޤަވާއިދުން މަސްވެރިންނަށް ފައިސާ ދޫކުރަން ފަށައިފައިވަނީ މިދިޔަ އަހަރުގެ މަސްވެރިންގެ ދުވަހުން ފެށިގެންނެވެ. އެގޮތުން މަސްވެރިންގެ ދުވަހުގެ ޚާއްސަ ޖަލްސާގައި އެކަން އިއުލާނުކުރެއްވީ ރައީސް ޑރ. މުޙައްމަދު މުޢިއްޒުއެވެ.

އެ މަސައްކަތުގެ ތެރެއިން މިދިޔަ އަހަރު ނިމުނުއިރު މަސްވެރިންނަށް ބިލިއަނަކަށް ވުރެ ގިނަ ރުފިޔާ ޖަމާކޮށްފައިވާއިރު، އޭގެ ތެރޭގައި  ސަރުކާރު ބަދަލުވުއިރު މަސްވެރިންނަށް ނުދީ ހުރި 250 މިލިއަނެއްހާ ރުފިޔާ ވެސް ހިމެނެއެވެ.