އެމްއޭސީއެލުން ބިންހިއްކުމުގެ މަޝްރޫއުތައް ކުރިއަށް ގެންދަވަނީ، އެރޮނގުން ކުރިއަރާފައިވާ، އެންމެ ފެންވަރު ރަނގަޅު، ބޭރުގެ ދެ ކުންފުންޏަކާއެކު ހެދިފައިވާ އެއްބަސްވުންތަކުގެ ދަށުން ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު މިރޭ ވިދާޅުވެއްޖެ އެވެ.

ރައީސް މިހެން ވިދާޅުވީ ކޮމަންޑޫގައި މިރޭ ބޭއްވި ޖަލްސާގައި ވާހަކަފުޅު ދައްކަވަމުންނެވެ. ށ އަތޮޅުގެ ރަށްތަކަށް ފެއްޓެވި ދަތުރުފުޅުގައި އެ އަތޮޅުގައި ދެ އެއާޕޯޓް އަޅުއްވާނެ ކަމަށް ރައީސް ވަނީ ވިދާޅުވެފަ އެވެ. އެއީ ކޮމަންޑޫއާ ބިލެތްފަހީގަ އެވެ.

އޭގެ ކުރީން ވަޑައިގެންނެވި ރަށްރަށުގެ ތެރެއިން އއ. މަތިވެރި އާއި ހއ. ދިއްދޫ އާއި ފ. ނިލަންދޫގައި ވެސް އެއާޕޯޓް އަޅުއްވާނެ ކަމަށް ވަނީ ވިދާޅުވެފަ އެވެ. އެ އެއާޕޯޓްތައް ދެ އަހަރާއި ބައިން -- 30 މަސް ދުވަހުގެ ތެރޭގައި ނިންމުމަކީ ރައީސްގެ އަމާޒެކެވެ.

މިރޭގެ ޖަލްސާގައި ރައީސް ބައިވެެރިވެވަޑައިގަންނަވަނީ --

އެ މަޝްރޫޢުތައް ހިންގުމަށް އެންމެ މުހިންމީ އެއާޕޯޓަށް ބޭނުންވާ ބިން ހިއްކުމެވެ. އެކަން ކުރެވޭނެތޯ ބައެއް ފަރާތްތަކުން ސުވާލުކުރަމުންދާ ވަގުތެއްގައި ރައީސް ވަނީ އެމްއޭސީއެލުން ބިންހިއްކުމުގެ މަޝްރޫއުތައް ކުރިއަށް ކުރިއަށް ގެންދަން ނިންމާފައިވާ ގޮތުގެ ތަފްސީލް ދެއްވާފަ އެވެ.

ރައީސް ވިދާޅުވީ އެމްއޭސީއެލުން ބިންހިއްކުމުގެ މަޝްރޫއުތައް ކުރިއަށް ގެންދަވަނީ، އެރޮނގުން ކުރިއަރާފައިވާ، އެންމެ ފެންވަރު ރަނގަޅު، ބޭރުގެ ދެ ކުންފުންޏަކާއެކު ހެދިފައިވާ އެއްބަސްވުންތަކުގެ ދަށުން ކަމަށެވެ.

މިރޭގެ ޖަލްސާގައި ރައީސް ވާހަކަފުޅު ދައްކަވަނީ --

އަދި ވިދާޅުވީ ގާތްގަނޑަކަށް 11000 ޓަނުގެ ޑްރެޖަރެއް މިމަސް ނިމޭއިރު ރާއްޖެ ގެނެވޭނެ ކަމަށެވެ. ކުރިއަށް އޮތް ނޮވެމްބަރު މަހުގެ ތިން ވަނަ ހަފުތާގެ ތެރޭގައި 40000 ޓަނުގެ ޑްރެޖަރެއް ރާއްޖެ ގެންނާނެ ކަމުގައި ރައީސުލްޖުމްހޫރިއްޔާ ވިދާޅުވި އެވެ.

އެ ޑްރެޖަރު މަސައްކަތް ކުރާނީ ރަސްމާލޭގައި ކަމަށާ، ތިން ވަނަ ޑްރެޖަރު ޑިސެމްބަރު މަހުގެ ތެރޭގައި ގެނަސް، ހއ. ދިއްދޫގެ ޕްރޮޖެކްޓު ތިން ހަފުތާއެއްހާ ދުވަހުގެ ތެރޭގައި ނިންމަވާނެ ކަމަށް ވިދާޅުވި އެވެ. ދެން ފަށާނީ ށ. ކޮމަންޑޫ އެއާޕޯޓް ތަރައްގީ ކުރުމަށް ބޭނުންވާ ބިންހިއްކުމުގެ މަސައްކަތް ކަމުގައި ވިދާޅުވެ، މަޝްރޫއުގެ ތަފްސީލުތައް، ރައީސުލްޖުމްހޫރިއްޔާ ވަނީ ދެއްވާފަ އެވެ.