ވަރލްޑްކަޕުން ޖާގައެއް ނުލިބި އިސްރާއީލް ކަޓައިފި
ވަރލްޑްކަޕުން ޖާގައެއް ހޯދުމަށް އިސްރާއީލް ކުރަމުންއައި އުއްމީދުތައް އިޓަލީން ފެނަށް ދުއްވާލައިފިއެވެ.
ވަރލްޑްކަޕުން ޖާގައެއް ހޯދުމުގެ ދޮރު އިސްރާއީލަށް ބަންދުވީ، ކޮލިފައިންގައި ރޭ އިޓަލީ އާ ދެކޮޅަށް ކުޅުނުމެޗުން 0-3 ގެ ނަތީޖާއަކުން ބަލިވުމުންނެވެ. މެޗްގައި އިޓަލީގެ ފުރަތަމަ ލަނޑު ފުރަތަމަ ހާފްގައި ފެނިގެންދިޔައިރު ދެވަނަ ލަނޑާއި ތިންވަނަ ލަނޑު ޖަހާފައިވަނީ ފަހުހާފްގައެވެ.
އިޓަލީގައި ރޭ މިމެޗް ކުލެފައިވަނީ ސަލާމަތީ ފިޔަވަޅުތައް ވަރަށްބޮޑަށް ވަރުގަދަކޮށްގެންނެވެ. އެގޮތުން މެޗް ކުޅެމުން ދިޔައިރު ސްޓޭޑިއަމް ބޭރާއި އެތެރޭގެ ސަލާމަތީ ފިޔަވަޅުތައް ހުރީ ވަރަށް ވަރުގަދަކޮށްފައެވެ. މެޗް ކުޅެމުންދިޔައިރު ސްޓޭޑިއަމް މަތީގައި ސްނައިޕަރުން ހަރަކާތެރިވަމުން ދިޔަކަމަށް އިސްރާއީލްގެ މީޑިއާތަކުން ވަނީ ބުނެފައެވެ.
އިޓަލީ އާއި އިސްރާއީލް ބައްދަލުކުރި މެޗްގެ ތެރެއިން.. ފޮޓޯ: އޭޕީ
މެޗް ފެށުމުގެ ކުރިންވެސް ފަލަސްތީނަށް ތާއީދުކުރާ އިޓަލީގެ ރައްޔިތުން ދިޔައީ އިސްރާއީލް ޓީމްގެ ހޮޓަލާއި އަދި މެޗްކުޅުނު ސްޓޭޑިއަމް ސަރަހައްދުގައި މުޒާހަރާ ކުރަމުންނެވެ. މެޗްްގެ ތެރެއިން ފަލަސްތީނަށް ސަޕޯޓްކުރާ ބައެއް ސަޕޯޓަރުން ދަނޑަށް ވަދެގަތުމަށް މަސައްކަތް ކުރިނަމަވެސް ސެކިއުރެޓީން ވަނީ އެމީހުން ހުއްޓުވާފައެވެ. މެޗް ފެށުމުގެ ކުރިން އިސްރާއީލްގެ ޤައުމީ ސަލާން ކިޔަމުންދިޔައިރު ދަނޑުގައި ތިބި އިޓަލީއަށް ނިސްބަތްވާ ފަލަސްތީނު ސަޕޯޓަރުން ވަނީ އަޑުގަދަކޮށްފައެވެ.
މެޗަށްފަހު އިސްރާއީލްގެ މީޑިއާތަކުން ވަނީ އެޤައުމު ވަރލްޑްކަޕުން ކެޓުމުގެ ޒިންމާ ފަލަސްތީނު ރައްޔިތުންގެ ބޮލުގައި އަޅުވާފައެވެ. އެގޮތުން ވަރލްޑްކަޕަށް ކޮލިފައިވުމަށް ކުރި ދަތުރުގައި ފަލަސްތީނަށް ތާއީދުކުރާ ފަރާތްތަކުގެ ސަބަބުން އިސްރާއީލް ޓީމަށް ނަފްސާނީގޮތުން ވަރަށްބޮޑު ގޮންޖެހުންތަކެއް ކުރިމަތިވެގެން ދިޔަކަމަށް އެޤައުމުގެ މީޑިއާތަކުން ވަނީ ފާހަގަކޮށްފައެވެ.
Advertisement
This content is created and paid for by advertisers and does not involve Voice Journalists
