ސަރުކާރު މައި ވިޔަފާރި ކުންފުނި، އެސްޓީއޯ މެދުވެރިކޮށް ގަނޑުކޮށް ގެންނަން ނިންމާފައިވާ ޒަރޫރީ މުދާ އަދި ތަރުކާރީގެ 23 ބާވަތް ރާއްޖޭގެ މާކެޓުން އަގު ހެޔޮކޮށް މިއަދުން ފެށިގެން ލިބެން ހުންނާނެ ކަމަށް އެ ކުންފުނީގެ މެނޭޖިން ޑިރެކްޓަރު ޝިމާދު އިބްރާހިމް ވިދާޅުވެއްޖެއެވެ.

ކާޑުގެ ބާވަތްތަކުގެ އިތުރުން، ރާއްޖޭގައި އެންމެ ގިނައިން ބޭނުންކުރާ މޭވާ އާއި ތަރުކާރީގެ ބާވަތްތައް އެސްޓީއޯ އިން ގަނޑުކޮށް އެތެރެކޮށް، ބާޒާރުގައި ވިއްކަން ނިންމާފައިވާކަން މިދިޔަ މަހުގެ 10 ވަނަ ދުވަހު، ރައީސް ޑރ. މުހައްމަދު މުއިއްޒު ވަނީ އިއުލާންކުރައްވާފައެވެ.

ރައީސްގެ އެ ނިންމެވުމާއި އެއްގޮތަށް، މި މަހުގެ 15 ވަނަ ދުވަހުން ފެށިގެން އެސްޓީއޯގެ ފިހާރަތަކުން އެ 23 ބާވަތުގެ މުދާ ހެޔޮ އަގުގައި ލިބެން ހުންނާނެ ކަމަށް އެސްޓީއޯއިން މީގެ ކުރިން ވަނީ ބުނެފައެވެ.

އިގްތިސާދީ ތަރައްގީއާ ބެހޭ ވަޒީރު މުޙައްމަދު ސައީދު އަދި އެމްޑީ ޝިމާދު މިއަދު ނޫސްވެރިންނާއި އެކު ބޭއްވި ބައްދަލުކުރެއްވުމެއްގައި އެމްޑީ ޝިމާދު ވިދާޅުވީ މިއަދުން ފެށިގެން އެ މުދާތައް އެސްޓީއޯއިން އަގު ހެޔޮކޮށް ލިބެން ހުންނާނެ ކަމަށާއި، އެސްޓީއޯއިން އެ މަސައްކަތް ފަށައިފައިވަނީ އެންމެ ފުރަތަމަ ރީޓެއިލްކޮށް ވިއްކާ ގޮތަށް ކަމަށެވެ.

އެސްޓީއޯގެ އެމްޑީ ޝިމާދު ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަނ

 މިހާރު އެސްޓީއޯއިން މާލޭގެ ސިނާއީ ސަރަޙައްދުގައި ތައްޔާރުކުރާ ސްޓޯރޭޖް ފެސިލިޓީއާއެކު ހޯލްސޭލްކޮށް އެ މުދާތައް ވިއްކުމުގެ މަސައްކަތް ފެށޭނޭކަން ފާހަގަކުރައްްވަމުން، އެތަން ކުރިޔަށް އޮތް ރޯދަ މަހުގެ ކުރިން ނިންމުމަކީ އަމާޒެއް ކަމަށް އެމްޑީ ވިދާޅުވިއެވެ.

އެމްޑީ ވަނީ ހޯލްސޭލްކޮށް މަސައްކަތްތައް ފެށުމަށްޓަކައި އެސްޓީއޯއިން މީގެ ކުރިން މަކީޓާގެ ޝޯވްރޫމުގް ގޮތުގައި ބޭނުންކުރަމުން އައި ފިހާރަ، ހޯލްސޭލް ސެންޓަރެއްގެ ގޮތުގައި ބަދަލުކޮށް އެ ފިހާރައިން ވިޔަފާރިވެރިންނަށް ޚިދުމަތް ދިނުމަށް ތައްޔާރުވަމުންދާކަން ވެސް ވިދާޅުވެފައެވެ.

އަދި އެ 23 ބާވަތުގެ މުދާތައް ރާއްޖޭގެ ރަށްތަކަށް ސަޕްލައިކުރުމަށްޓަކައި މާލޭގެ ބަނދަރާއި ހަމައަށް ޑެލިވަރީކޮށްދިނުމާއި، އެސްޓީއޯގެ އަތޮޅުތެރޭގެ ފިހާރަތަކުން ލިބޭނެ ގޮތް ހަމަޖައްސާނެ ކަމަށް ވެސް ޝިމާދު ވަނީ ވިދާޅުވެފައެވެ.