ފުޑް ސެކިއުރިޓީ ޤާއިމްކުރެވޭ ވަރަށް ދަނޑުވެރިކަން ފުޅާވާނެ ކަމަށް އުންމީދުކުރަން: ރައީސް
ރާއްޖޭގައި ފުޑް ސެކިޔުރިޓީ ޤާއިމު ކުރެވޭ ވަރަށް ދަނޑުވެރިކަން ފުޅާކުރެވޭނެކަމަށް އުންމީދުކުރައްވާ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
ދަނޑުވެރިންގެ ދުވަހުގެ މުނާސަބަތުގައި ސޯޝަލް މީޑީޔާގައި ކުރެއްވި ޕޯސްޓެއްގައި ރައީސް ވިދާޅުވީ، ދިވެހި ބިންތަކަކީ ފައިދާހުރި މޭވާއާއި، ތަރުކާރީ އަދި ގޮވާމާއި ފަލަމަޑި ލިބޭ، މުޑުވައްކުރަން ރަނގަޅު ބިންތަކެއްކަން ކާބަފައިން ވަނީ ސާބިތުކޮށްދީފައިވާ ކަމަށެވެ.
އެގޮތުން ދަނޑުވެރީންގެ ދުވަހުގެ ހެޔޮ އެދުންތައް އެ ޞިނާޢަތް ކުރިއަރުވައި ފުޅާކުރަން ހީވާގިކަމާއެކު މަސައްކަތްކުރާ ހުރިހާ ފަރާތްތަކަށް ރައީސް ވަނީ ފޮނުއްވާފައެވެ.
އަދި އެ ހެޔޮ އެދުންތައް ފޮނުވަނީ ރާއްޖޭގައި ގައުމަށް ފުދޭވަރަށް، ފުޑް ސެކިޔުރިޓީ ޤާއިމު ކުރެވޭ ވަރަށް، ދަނޑުވެރިކަން ފުޅާކުރެވޭނެކަމުގެ ފޮނި އުންމީދުތަކާއެކު ކަމަށް އެ ޕޯސްޓުގައި ރައީސް ވިދާޅުވެފައިވެއެވެ.
ރާއްޖޭގައި ފުޑް ސެކިއުރިޓީ ޤާއިމްކުރުމަށް ސަރުކާރުންކުރަމުންދާ މަސައްކަތްތަކުގެ ތެރެއިން ކާޑުގެ ބާވަތްތަކުގެ އިތުރުން، ރާއްޖޭގައި އެންމެ ގިނައިން ބޭނުންކުރާ މޭވާ އާއި ތަރުކާރީގެ ބާވަތްތައް އެސްޓީއޯ އިން ގަނޑުކޮށް އެތެރެކޮށް، ބާޒާރުގައި ވިއްކަން ނިންމާފައިވާކަން މިދިޔަ މަހުގެ 10 ވަނަ ދުވަހު، ރައީސް ޑރ. މުހައްމަދު މުއިއްޒު ވަނީ އިއުލާންކުރައްވާފައެވެ.
ރައީސްގެ އެ ނިންމެވުމާއި އެއްގޮތަށް، މިއަދުން ފެށިގެން އެސްޓީއޯގެ ފިހާރަތަކުން އެ 23 ބާވަތުގެ މުދާ ހެޔޮ އަގުގައި ލިބެން ހުންނާނެ ކަމަށް އެސްޓީއޯއިން މިއަދު ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
