ކޮޅުވެއްޓިއެއް ބަންޑުން ޖަހާލައި ރޭ ހިނގި ނުރައްކާތެރި ހާދިސާގައި އެކަކު ނިޔާވުމާ ގުޅިގެން ރައީސް ޑރ. މުޙައްމަދު މުޢިއްޒު ތަޢުޒިޔާ ވިދާޅުވެއްޖެއެވެ.
ރޭ ދަންވަރު މާލެއިން ފުރައިގެން ރީތިރަށް ރިސޯޓަށް ދަތުރުކުރަނިކޮށް ބަންޑުން ޖަހާލި އެ އުޅަނދަކީ ދިގުމިނުގައި 100 ފޫޓު ހުރި އުޅަނދެކެވެ. އެ އުޅަނދުން 3 މީހަކު ގެއްލިގެން ހޯދަމުންދާއިރު، އެކަކު ވަނީ ނިޔާވެފައެވެ.
އެ ޙާދިސާގެ ހިތާމަ ފާޅުކުރައްވަމުން ރައީސް މުޢިއްޒު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވެފައިވަނީ މި ހިތާމަވެރި ހާދިސާގައި ގެއްލިފައިވާކަމަށް ފާހަގަކުރެވިފައިވާ ދެ މީހުން ހެޔޮ ޙާލުގައި ތިއްބާ ފެނުމަށް އެދި ދުޢާކުރައްވާ ކަމަށާއި، މިހާތަނަށް ސަލާމަތްވެފައިވާ ފަރާތްތަކަށް ކުރިމަތިވެފައިވާ ޞިއްޙީ އަދި ނަފްސާނީ ދަތިތަކަށް އަވަސް ޝިފާއެއް ލިބި، އާންމު ހާލަތަށް އައުމަށް އެދި ދުޢާކުރައްވާ ކަމަށްވެސް ރައީސް ވިދާޅުވެފައިވެއެވެ.
"އިރާދަކުރެއްވިއްޔާ، ހުރިހާ ފަޅުވެރީންނާމެދުވެސް ދެވެން އޮތް ހުރިހާ އަޅައިލުމަކާއި އެހީތެރިކަމެއް، އަދި ގެއްލިފައިވާ މީހުން ހޯދުމަށް ކުރެވެން ހުރި ހުރިހާ މަސައްކަތެއް ސަރުކާރުގެ ކަމާބެހޭ އިދާރާތަކުން ޚާއްޞަ ސަމާލުކަމަކާއެކު ކުރަމުން ގެންދާނެ،" ރައީސް ވިދާޅުވިއެވެ.
އަދި މި ފުރުސަތުގައި، މޫސުން ގޯސް ޙާލަތްތަކުގައި، ކަމާބެހޭ އިދާރާތަކުގެ އިލްތިމާސްތަކަށް އިޖާބަ ދިނުމަށާއި، ދަތުރުމަތީގެ ރައްކައުތެރިކަން ހުރިހާ ގޮތަކުން ކަށަވަރު ކުރުމަށް ކަނޑުދަތުރު ކުރައްވާ ފަރާތްތަކަށް ރައީސް ނަސޭހަތްތެރިވެވަޑައިގެންފައިވެއެވެ.
Advertisement
This content is created and paid for by advertisers and does not involve Voice Journalists
