މިދިޔަ ސަރުކާރުން ދިން ގެދޮރުވެރިޔާގެ ފްލެޓްތަކުގެ ތެރެއިން އެއްބަސްވުން ހެދުމަށްފަހު ބައެއް ފަރާތްތަކުގެ އަތުން ފްލެޓްތައް އަތުލުން ޤާނޫނު އަސާސީ އާއި ޚިލާފު ކަމަށާއި، އެކަމުގައި ޖިނާއީ ރުކުންތައް އެކުލެވޭ ކަމަށް އެމްޑީޕީގެ ބޯހިޔާވަހިކަމުގެ ކޮމެޓީގެ ޤާނޫނީ ވަކީލު މުޙައްމަދު ނިޝާން އިބްރާހީމް ވިދާޅުވެއްޖެއެވެ.

މިއަދު އެމްޑީޕީން ބޭއްވި ނޫސްވެރިންގެ ބައްދަލުވުމުގައި ނިޝާން ވިދާޅުވީ، އެ ފްލެޓްތަކަކީ ބަޔަކާއި އެކު އެއްބަސްވުމެއް ހެދިފައިވާ ފްލެޓްތަކަށްވާއިރު، އެ އެއްބަސްވުންތަކާއި ޚިލާފަށް އެތަންތަން އަތުލުން ޤާނޫނު އަސާސީއާއި ޚިލާފުކަމަށާއި، އެއީ ލޫޓުވުން ކަމުގައި ނިޝާން ވިދާޅުވިއެވެ.

މިއަދު އެމްޑީޕީން ބޭއްވި ނޫސްވެރިންގެ ބައްދަލުމުގެ ތެރެއިން -- ވޮއިސް ފޮޓޯ

އެގޮތުން ރާއްޖޭގެ ޤާނޫނު އަސާސީގައި 40ވަނަ މާއްދާގައިވާ ގޮތުން ގެދޮރާއި މުދަލަކީ ހުރުމަތްތެރިކަން ލިބިގެންވާ ތަކެއްޗަށްވާއިރު، އެތަކެތި އަތުލެވޭނީ އަދުލުވެރި ބަދަލެއް ދިނުމަށްފަހު ޝަރުޢީ ކޯޓަކުން ނިންމުމުން ކަމަށް ނިޝާން ވިދާޅުވިއެވެ.

ނިޝާން ވިދާޅުވީ އެގޮތުން ވެސް މުދަލެއް ނަގާނަމަވެސް އެކަން ކުރެވޭނީ މީހެއްގެ ރުހުމާއި އެކީގައި ކަމަށް ވެސް އެ މާއްދާގައި އޮންނަ ކަމަށާއި، އެ ފްލެޓްތައް ނަގައިފައިވަނީ އެމީހުންގެ ރުހުމާއި އަދި ހުއްދައާއި ނުލައިކަމުން އެކަމަކޫ ޤާނޫނު އަސާސީގެ މާއްދަތަކާއި ޚިލާފަށް ކޮށްފައިވާކަމެއްކަން ސާފުވާ ކަމަށެވެ.

އެގޮތުން ޤާނޫނު އަސާސީގެ 23 ވަނަ މާއްދާ، 121 ވަނަ މާއްދާ އާއި 17 ވަނަ މާއްދާގެ އިތުރުން 20 ވަނަ މާއްދާ އާއި އެ ކަންތައް ޚިލާފުކަމަށް ވެސް ނިޝާން ވިދާޅުވިއެވެ.

މިއަދު އެމްޑީޕީން ބޭއްވި ނޫސްވެރިންގެ ބައްދަލުމުގެ ތެރެއިން ނިޝާނު ވާހަކަފުޅު ދައްކަވަނީ -- ވޮއިސް ފޮޓޯ

އެއާއެކު ނިޝާން ވަނީ އެކަމުގައި "ޖިނާއީ ރުކުންތައް ހަމަވާ އަމަލުތަކެއް" ދައުލަތުގެ ބާރުހުރި ފަރާތްތަކުން ހިންގާފައިވާކަން ފާހަގަކުރައްވާފައެވެ. އެގޮތުން ޤާނޫނުލް އުގޫބާތުގެ 211ވަނަ މާއްދާގެ ހގައި ބަޔާންކުރާ ހަމަތައް އެކަމުގައި ހަމަވާ ކަމަށް ނިޝާން ވިދާޅުވިއެވެ.

އެގޮތުން ޤާނޫނުލް އުގޫބާތުގެ 211ވަނަ މާއްދާގެ ހ ގައި އޮތީ:

1. އަންނަނިވި ހާލަތްތަކުގައި، އަންނަނިވި އަމަލުކުރާ މީހާ، އެކުރަނީ ކުށެކެވެ:

2. އެހެން މީހެއްގެ މުދަލެއް އެމީހަކަށް ނޭނގި ސިއްރުން ނެގުން ނުވަތަ އެހެން މީހެއްގެ މުދަލުގެ މައްޗަށް ހުއްދަނޫން ގޮތެއްގައި ތިމާގެ އަމިއްލަ  ބާރުހިންގުން އަދި އެކަން އެކުރަނީ އަނެކާއަށް އޮތް އަތުގެވެރިކަމުން، އެ މުދާ ދާއިމަށް ނިގުޅައިގަތުމުގެ މަގްސަދުގައި ކަމުގައިވުން.

ނިޝާން ވަނީ އެ މައްސަލަ ބަލައިދިނުމަށް ރާއްޖޭގެ ޕްރޮސެކިއުޓާ ޖެނެރަލް (ޕީޖީ) އަށް ގޮވާލާފައެވެ. އެގޮތުން މި މައްސަލައިގައި ތުހުމަތުކުރެވޭ ވަރަށް ގިނަ ފަރާތްތައް ތިބޭނެ ކަމަށާއި، އެމީހުންގެ މައްޗަށް ޤާނޫނީ ފިޔަވަޅު އެޅުމަށް ދައުވާ އުފުލުމަށް ޕީޖީގެ އަށް ނިޝާނު ވަނީ ގޮވާލައްވާފައެވެ.

މިދިޔަ ސަރުކާރުން ދިން 4،000 ފްލެޓުގެ ތެރެއިން ބައެއް ފްލެޓުތައް ވިއްކާލަން އުޅޭ ކަމަށް ބުނެ ސޯޝަލް މީޑިޔާގައި ވާހަކަތަކެއް ދައުުރު ވެސް ވިއެވެ. މިއަދުގެ ޕްރެސްގައި ވެސް އެކަމުގެ ކަންބޮޑުވުން އިދިކޮޅު އެމްޑީޕީން ފާޅުކޮށްފައިވާއިރު، އެކަން ސަރުކާރުން މީގެ ކުރިން ވަނީ ދޮގުކޮށްފައެވެ.

އެހެން ނަމަވެސް އެ ފްލެޓުތައް ލިބުނު ކަމުގެ އެއްބަސްވުމުގައި 2023 ވަނަ އަހަރުގެ ނޮވެމްބަރު މަހުގެ ތެރޭގައި ސޮއިކުރި ބައެއް މީހުންނަށް އެ ފްލެޓުތައް ނުލިބޭކަމަށް މިހާރު ވެސް ވަނީ ކަނޑައަޅާފައެވެ.