މި ފަހުގެ ތާރީހެއްގައި ދިވެހި ސިނަމާއިން ފެނިގެންދިޔަ ފިލްމްތަކުގެ ތެރެއިން ގިނަ ބަޔަކު މާސްޓާ ޕީސްއެއްގެ ގޮތުގައި ސިފަކުރި ފިލްމް، އަލިފާނުގެ ވަދާޢީ ޝޯތައް ދައްކަން ފަށައިފިއެވެ.

މުޅިން ތަފާތު ޖޯންރާއެއްގެ މައްޗަށް ބިނާކޮށް ޑާކްރެއިނުން ބެލުންތެރިންނަށް ގެނެސްދިން އަލިފާން މި ފިލްމަކީ، އޮލިމްޕަހުގައި އެޅުވި އެންމެ ތަފާތު އެއް ފިލްމެވެ. މި ފިލްމަކީ މާސްޓާ ޕީސްއެއްކަމަށް ގިނަބަޔަކު ބުނާ އެއް ސަބަބަކީ މިއީ ރާއްޖޭގެ މަޝްރަހްގައި ހިނގާ ނޭދެވޭ ކަންތައްތައް މުޖުތަމައުއަށް ތިލަކޮށްދިން ފިލްމަކަށްވާތީ ކަމަށެވެ. މި ފިލްމް އޮލިމްޕަހުގައި ދައްކަން ފަށާފައިވަނީ އޮކްޓޯބަރުމަހުގެ 6 ވަނަ ދުވަހުއެވެ.

ފިލްމް އޮލިމްޕަހުގައި ދައްކަން ފެށިފަހުން ބެލުންތެރިން ހިއްސާކުރި ހިޔާލުތަކަށް ބަލާއިރު މި ފިލްމަކީ ދިވެހި ޕްރޮޑަކްޝަން ހައުސްއަކުން ތައްޔާރުކުރި ޓެކްނިކަލީ އެންމެ މޮޅު އެއް ފިލްމެވެ. ސަބަބަކީ މި ފިލްމްގެ މަންޒަރުތައް ނެގުމުގައި ބޭނުންކޮށްފައިވާ މޮޅެތި އުކުޅުތަކެވެ. 

ފިލްމުގައި ހިމެނޭ ކާސްޓުންގެ އެކްޓިންނަށް ބަލާއިރު، ފިލްމުގައި އެމީހުންގެ ފަރާތުން މުޅިން ތަފާތު އެކްޓިންނެއް ފެނިގެންދިޔަކަމަށް ފިލްމުބެލި ގިނަ މީހުން ވަނީ ފާހަގަކޮށްފައެވެ. އެގޮތުން މިއީ އެމީހުންނަށް ދިވެހި އެކްޓަރުންގެ ފަރާތުން ފެންނާނޭކަމަށް ކުރިން ހީކުރި އެކްޓިންނެއް ނޫންކަމަށްވެސް ފިލްމް ބެލި ބައެއް މީހުން ވަނީ ސޯޝަލް މީޑިއާގައި ހިއްސާކޮށްފައެވެ.

ޑާކްރައިނުން ބުނީ އޮލިމްޕަހުގައި އަލިފާނުގެ އެންމެފަހު ޝޯ ދައްކާނީ މިމަހުގެ 19 ވަނަ ދުވަހުގެ ރޭ ކަމަށެވެ. އެއީ އޮލިމްޕަހުގައި އައި ފިލްމެއް އެޅުވުމަށެވެ. މި ފިލްމު ދައްކަން ޝެޑިއުލް ކުރިއިރުވެސް ޔޫއްޕެގެ އައު ފިލްމް އޮތީ އޮލިމްޕަހުގައި ދައްކަން ތައްޔާރުވެފައެވެ. އަލިފާނުގެ ފަހު ޝޯތަކުގެ ޓިކެޓް ވިއްކަން ފަށާފައިވާއިރު، މިއީ ހަގީގަތުގައިވެސް މާސްޓާ ޕީސްއެއްތޯ ބަލާލުމަށް މިހާރު ބާކީ އޮތީ 4 ޝޯއެވެ.

ޑާކްރެއިނުން ބުނީ ފިލްމްގެ ޓިކެޓް އޮލިމްޕަހުންނާއި، ހޮޓްލައިން 9911229 އަށް ގުޅުމުން ލިބޭނޭކަމަށެވެ.