ރާއްޖޭގެ ސަރަހައްދަށް މޫސުން ގޯސްވެފައިވާ މި ދަނޑިވަޅުގައި ދިޔަވަރު ބޮޑުވާ ގަޑިތަކުގައި އުދަ އަރާފާނެތީ ސަމާލުވުމަށް މޫސުމާ ބެހޭ ޤައުމީ އިދާރާއިން އިލްތިމާސްކޮށްފިއެވެ.
މެޓުން ބުނީ މޫސުން މިހާރު އޮތްގޮތުން ރާއްޖޭގެ ސަރަހައްދަށް ހުޅަނގު މޫސުމުގެ ބާރު ގަދަވެ، ވައިގަދަވުމާއެކު ކަނޑުތައް ގަދަވެ، ވިއްސާރަވާނޭކަމަށް ލަފާކުރެވޭކަމަށެވެ. މި ދަނޑިވަޅުގައި މޫސުމަށް ބަލައި އެންމެފަހުގެ މައުލޫމާތު ކަށަވަރުކޮށްފައި ނޫނީ ކަނޑުމައްޗަށް ނޭރުމަށް މެޓް އޮފީހުން ވަނީ އިލްތިމާސްކޮށްފައެވެ.
މެޓް އޮފީހުން ބުނީ ދިޔަވަރު ބޮޑުވާ ގަޑިތަކުގައި އުދަ އަރާފާނޭަކަމަށް ލަފާކުރެވޭ ކަމަށާއި، އެހެންކަމުން އެކަމަށް ރައްކާތެރިވެތިބުމަށް އެދިފައެވެ.
މޫސުން ގޯސްވާނެތީވެ، ކަނޑުދަތުރުކުރާ ފަރާތްތަކުން ހާއްސަ ގޮތެއްގައި ސަމާލުވުމަށް އެމްއެންޑީއެފުންވެސް ވަނީ އިލްތިމާސްކޮށްފައެވެ.
ވޭތުވެދިޔަ 24 ގަޑިއިރުގެ ތެރޭގައި ކަނޑުމަތީގެ ހިތާވެރި ދެ ހާދިސާއެއް ވަނީ ހިނގާފައެވެ. މީގެ ތެރެއިން ރޭ ކޮޅުވެއްޓި އެއް ބަންޑުންޖަހާލުމުގެ ހާދިސާގައި އެކަކު ވަނީ ނިޔާވެފައެވެ. އަދި ކަނޑުވި މީހުންގެ ތެރެއިން އެކަކު މޫދު އަޑިން ދެންމެ ފެނިފައިވާއިރު، އެމީހާ ދިރިއޮތްކަން ނުވަތަ ނޫންކަން އަދި ކަމާބެހޭ ފަރާތަކުން ނުބުނެއެވެ. ކަނޑުވި މީހުންގެ ތެރެއިން އެކަކު އަދިވެސް ހޯދަމުންދާަކަމަށް އެމްއެންޑީއެފުން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
