މިއަދުވެސް ރާއްޖޭގެ ހުރިހާ ސަރަހައްދަކަށް މޫސުން ގޯސްވާނޭކަމަށް މޯލްޑިވްސް މީޓިއޮލޮޖިކަލް ސެންޓަރުން ލަފާކޮށްފިއެވެ.

މެޓް އޮފީހުން ވަނީ މިއަދު ރާއްޖޭގެ ހުރިހާ ސަރަހައްދަކަށް މޫސުން ގޯސްވާނޭކަމަށް ލަފާކޮށް ހުދު ސަމާލު ނެރެފައެވެ. ހުދު ސަމާލް ނެރެފައިވަނީ ހެނދުނު 09:30 ހުން ފެށިގެން މެންދުރުފަހު 15:30 ހަށެވެ. 

މޫސުމާ ބެހޭ ޤައުމީ އިދާރާއިން ބުނީ ހުދު ސަމާލް ނެރެފައިވާ ވަގުތުތަކުގައި ބޯކޮށް ވާރޭވެހި ގުގުރައި، ވިލާގަނޑުގައި ގަޑިއަކު 40 މޭލު ބާރުމިނުގައި ވައިޖެހޭނޭކަމަށް ލަފާކުރެވޭ ކަމަށެވެ. އެގޮތުން ކަނޑުތައް އާދައިގެ ވަރަކަށް ގަދަވާނެއެވެ.

މޫސުން ގޯސްވާނޭކަމަށް ބެލެވުމާ ގުޅިގެން ކަމާބެހޭ އިދާރާތަކުން ވަނީ މޫސުމަށް ސަމާލުވުމަށް އިލްތިމާސްކޮށްފައެވެ. ހާއްސަ ގޮތެއްގައި ކަނޑުދަތުރަށް އަރާ ފަރާތްތަކުން މޫސުމާ ބެހޭ އެންމެ ފަހުގެ މައުލޫމާތު ހޯދާފައިނޫނީ ކަނޑުމައްޗަށް ނޭރުމަށް އެފަރާތްތަކުން ވަނީ އިލްތިމާސްކޮށްފައެވެ.

މޫސުން ގޯސްވުމުގެ ސަބަބުން މިދިޔަ 72 ގަޑިއިރުގެ ތެރޭގައި ކަނޑުމަތީގެ ވަރަށް ނުރައްކާތެރި ދެ ހާދިސާއެއް ވަނީ ހިނގާފައެވެ. އެގޮތުން އިއްޔެރޭ ކޮޅުވެއްޓިއެއް ބަންޑުންޖަހާލުމުގެ ހާދިސާގައި ކަނޑުވި މީހުންގެ ތެރެއިން 2 މީހަކު ނިޔާވެފައިވާއިރު އެހާދިސާގއި ގެއްލުނު އެކަކު އަދިވެސް ނުފެނެއެވެ. މީގެ އިތުރުން މާލެއިން ނައިފަރަށް ދަތުރުކުރި މުދާއުފުލާ ބޯޓެއްވެސް ވަނީ ބަންޑުން ޖަހާލައި އަޑިއަށް ގޮސްފައެވެ.