ފިހާރައަކަށް ވައްކަންކުރަން ވަތްމީހާއަށް މުހިންމުވީ ކިރުދަޅު
އައްޑޫސިޓީ ރަށެއްގެ ފިހާރައަކަށް ރޭ ވަގަށް ވަތް މީހަކު އެ ފިހާރައިން ދެ ކިރުދަޅު ހިފައިގެން ފިލައިފިއެވެ.
ސޯޝަލް މީޑިއާގައި ވީޑިއޯ ދައުރުވަމުންދާއިރު، މިކަމެއް ހިނގާފައިވަނީ އައްޑޫސިޓީ ހުޅުދޫ ފިހާރައެއްގައެވެ. ފިހާރައިގެ ސީސީޓީވީ ފޫޓޭޖުން އެނގޭގޮތުގައި އޭނާ ވައްކަންކުރަން ފިހާރަށް ވަދެފައިވަނީ، މެންދަމު 02:56 ހާއިރުއެވެ. ފިހާރައަށް އޭނާ ވަދެވުނީ ކުޑައިރުކޮޅެއްގެ މަސައްކަތަށްފަހު ކަށިގަނޑެއްފަދަ އެއްޗަތުން ތަޅު ހަލާކުކޮށްލައިގެންކަން އެނގެއެވެ.
ފިހާރަށް ވަނުމަށްފަހު އޭނާ ނަގާފައިވަނީ ކޯސްޓް ބްރޭންޑްގެ ދެ ކިރުދަޅުކަން ވީޑިއޯއިން އެނގެއެވެ. ކިރުދަޅު ނެގުމަށްފަހު އެމީހާ ފިހާރައިން ނިކުމެގެން ދިޔައިރު އިތުރު އެއްވެސް އެއްޗެއްގައި އަތްލިކަމެއް ވީޑިއޯއަކުން ފާހަގައެއް ނުކުރެއެވެ. އެންމެކުޑަމިނުން ކައުންޓަރު ވަތްގަނޑު ހުޅުވާތަނެއްވެސް ނުފެނެއެވެ.
ފިހާރަތަކުން ވައްކަންކުރާ މީހުން އާއްމުގޮތެއްގައި އެންމެގިނައިން ނަގާ އެކެއްޗަކީ ކިރުދަޅެވެ. ކިރުދަޅު ވަގަށްނެގުމުގެ މައްސަލަތަކުގައި މީގެ ކުރިން އެތައްފަހަރަކު މީހުންނަށް ބަންދުގެ މުއްދަތު ޖަހައި ކޯޓުން ހުކުމްކޮށްފައިވެއެވެ. އަދި ބައެއް ފަހަރަށް ކިރުދަޅު ވަގަށްނެގުމުގެ މައްސަލަ ޕީޖީ އޮފީހާ ހަމައަށްވެސް ގޮސްފައި އެބަހުއްޓެވެ.
Advertisement
This content is created and paid for by advertisers and does not involve Voice Journalists
