ޔުއެފާ ޔޫރޮޕާ ލީގްގައި އެސްޓަން ވިލާ އށާއި އިސްރާއީލްގެ މެކަބީ ތެލްއަވީވް ބައްދަލުކުރާ މެޗަށް ޔަހޫދީ ސަޕޯޓަރުންނަށް ނުވަދެވޭނޭކަމަށް ފުލުހުން އަންގައިފިއެވެ.

އެސްޓަން ވިލާގެ ސްޓޭޑިއަމް ވިލާ ޕާކްގައި މެކަބީ ތެލްއަވީވް އާ ބައްދަލުކުރާ މެޗް ކުޅުމަށް ތާވަލްކޮށްފައިވަނީ އަންނަ ނޮވެމްބަރުމަހުގެ 7 ވަނަ ދުވަހުއެވެ. މިކަމާ ގުޅޭގޮތުން ވެސްޓް މިޑްލޭންޑްގެ ޕޮލިހުން ބުނެފައިވަނީ ސަލާމަތީ ސަބަބުތަކަށްޓަކައި ވިލާޕާކަށް މެޗްކުޅޭ ދުވަހު މެކަބީގެ ސަޕޯޓަރުންނަށް ވަނުމުގެ ހުއްދަ ދެވެންނެތްކަމަށެވެ. އެކަން އެގޮތަށް ނިންމާފައިވަނީ ދިރާސާކުރަންޖެހޭ ވަރަށް ދިރާސާކޮށް ހުރިހާ ފަރާތްތަކެއްގެ ސަލާމަތަށްޓަކައި ކަމަށްވެސް ފުލުހުން ބުންޏެވެ.

ވެސްޓް މިޑްލޭންޑް ފުލުހުންގެ އެ ނިންމުމާ ގުޅިގެން އިސްފަރާތްތައް ނުރުހުނު ނަމަވެސް ފުލުހުން ބުނެފައިވަނީ ކިތަންމެ ފާޑުކިޔުން އައިނަމަވެސް އެކަމަށް ހުއްދަ ދެވޭނެ ހަމައެއް ނެތްކަމަށާއި، އެ ނިންމުން ބަދަލުނުވާނޭކަމަށެވެ. ފުލުހުން ބުނެފައިވަނީ ޣައްޒާ ހަނގުރާމަ އާ ގުޅިގެން އިސްރާއީލް ސަޕޯޓަރުން ވަންނަ މެޗްތަކުގައި ބޮޑެތި ހަމަނުޖެހުންތަކެއް ފެނިެގން ގޮސްފައިވާަކަމަށެވެ. އެގޮތުން އެންމެފަހުން ނެދަލޭންޑްސްގައި އަޔެކްސްއާ ދެކޮޅަށް ކުޅުނު މެޗްވެސް ހަމަނުޖެހުންތައް ހިނގާފައިވާކަން ފުލުހުން ވަނީ ފާހަގަކޮށްފައެވެ. އެހެންކަމުން އެ ރިސްކް ނެގެން ނެތްކަމަށް ފުލުހުން ވަނީ ބުނެފައެވެ.

މިކަމާ ގުޅިގެން ޔުއެފާއިން ބުނެފައިވަނީ އެ އިދާރާއިން އެދެނީ މެހެމާނުންނަށް އަދި އެނޫންވެސް ފަރާތްތަކަށް އަމާން މާހައުލެއްގައި ތިބެގެން މެޗް ބަލާލުމުގެ ކަންކަން ހަމަޖެހިގެން ދިއުންކަމަށެވެ.

ޣައްޒާ ހަނގުރާމައާ ގުޅިގެން މުޅި ޔޫރަޕްގައިވެސް ވަނީ ޔަހޫދީންނާ ދެކޮޅު ހަރަކާތްތަކެއް ފަށާފައެވެ. މީގެ ތެރޭގައި ކުޅިވަރު ދަނޑުތަކުގައިވެސް އިސްރާއީލާ ދެކޮޅު ހަރަކާތްތައް ހިންގަމުންދެއެވެ. މިކަމާ ގުޅިގެން އިސްރާއީލް ސަޕޯޓަރުން ބުނެފައިވަނީ ޣައްޒާގައި ހިނގަމުންދާ ހަނގުރާމައާ ކުޅިވަރާ ގުޅުވެން ނެތްކަމަށެވެ. މިކަމަށް ރައްދުދެމުން ޔަހޫދީންނާ ދެކޮޅަށް ހަރަކާތްތައް ހިންގަމުންގެންދާ ފަރާތްތަކުން ބުނެފައިވަނީ، އިސްރާއީލް ސިފައިން ޣައްޒާގައި އަންހެނުންނާއި ކުޑަކުދިންގެ އިތުރުން ކުޅިވަރު އާއިލާތަކުގެ ފުރާނަ ގެއްލުވާލަމުންދާއިރު، އެއީ ހަނގުރާމައެއްކަމަށް މާނަކުރެވޭނެ އެއްވެސް ހަމައެއް ނޯންނާނެ ކަމަށެވެ.