ކޮޅުވެއްޓި ބަންޑުން ޖަހާލި ހާދިސާ: ތިންވަނަ މީހާގެ ހަށިގަނޑު އޮޔާދަނިކޮށް ފެނިއްޖެ
މިދިޔަ ބުދަ ދުވަހުގެ ރޭ މެންދަމުގެ ވަގުތެއްގައި މާލެއިން ރީތިރަށް ރިސޯޓަށް ދަތުރުކުރަމުންދިޔަ "އަލްމާކް ފިޔަ" ނަމަކަށް ކިޔާ ކޮޅުވެއްޓި ބަންޑުން ޖަހާލި ހާދިސާގައި ކަނޑުވި މީހުންގެ ތެރެއިން ތިންވަނަ މީހާގެ ހަށިގަނޑު އޮޔާދަނިކޮށް ފެނިއްޖެއެވެ.
މިކަން އެންއެންޑީއެފުން މީގެ ކުޑައިރުކޮޅެއްކުރިން ވަނީ ޔަގީންކޮށްދީފައެވެ. އެމްއެންޑީއެފުން ބުނީ ބިދޭސީ މީހާގެ ހަށިގަނޑު ފެނުނީ ރޭގެ ވަގުތެއްގައި މާލެ އަތޮޅު އާއިލާފުށްޓާއި ވިލާ ނޮޓިކާއާ ދެ ރަށް ދޭތެރެއިން އޮޔާދަނިކޮށް ކަމަށެވެ.
ކޮޅުވެއްޓި ބަންޑުން ޖަހާލިއިރު އޭގައި ހަތް މީހުން ތިއްބެވެ. އޭގެ ތެރެއިން 4 މީހަކު ސަލާމަތްކުރެވުނުއިރު، ތިން މީހަކު ގެއްލުނެވެ. އޭގެ ތެރެއިން އެކަކު ކުރީން ވަނީ ފެނިފަ އެވެ. އެމީހާ ފެނިފައިވަނީ ކަނޑުގެ އަޑިން ކޯސްޓްގާޑުގެ ޑައިވަރުންނަށެވެ. އެމީހާ ކަނޑުން ނެގިއިރުވެސް އޮތީ މަރުވެފައިކަމަށް ފުލުހުން ވަނީ ބުނެފައެވެ. މަރުވެފައިވަނީ ގއ. ދާންދޫއަށް ނިސްބަތްވާ އުމުރުން 38 އަހަރުގެ އަހުމަދު ޝިފާން އެވެ.
ކޮޅުވެއްޓި ބަންޑުން ޖަހާލި ހާދިސާގައި ގެއްލުނު ދެވަނަ މީހާ ބްރާސްފަތި ދުވަހު ފެނިފައިވާއިރު، އެއީ ބިދޭސީއެކެވެ. އެމީހާވެސް ފެނުނުއިރު އޮތީ މަރުވެފައެވެ. ކޮޅުވެއްޓި ބަންޑުން ޖަހާލިތާ މާ ގިނައިރެއްނުވެ އެ އުޅަނދު ވަނީ ކަނޑުގެ އަޑިއަށް ގޮސްފައެވެ.
Advertisement
This content is created and paid for by advertisers and does not involve Voice Journalists
