ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބު އަންނަ އަހަރުގެ މާރިޗު މަހުގެ 28 ވަނަ ދުވަހު ބޭއްވުމަށް ނިންމައިފައިވާކަން އިލެކްޝަންސް ކޮމިޝަން (އީސީ)ން ހާމަކޮށްފިއެވެ.
ޕީއެސްއެމްގެ ރާއްޖެ މިއަދު ޕްރޮގްރާމުގައި ވާހަކަފުޅު ދައްކަވަމުން އިލެކްޝަންސް ކޮމިޝަނުގެ ރައީސް މުޙައްމަދު ޒާހިދު ވިދާޅުވީ، މި އަންނަ އަހަރުގެ ޖެނުއަރީ 17 އިން ފެށިގެން އެ އިންތިހާބަށް ކުރިމަތިލުމުގެ ފުރުސަތު ހުޅުވާލާނެ ކަމަށާއި، އިންތިހާބު ބޭއްވުމަށް ނިންމައިފައިވަނީ މާރިޗު 28 ގައި ކަމަށެވެ.
ޒާހިދު ވަނީ އެ އިންތިހާބުގައި ކެނޑިޑެންސީ ފޯމު ހުށަހެޅުމުގެ ބަދަލުގައި އިލެކްޝަންސް ކޮމިޝަނުގެ ޕޯޓަލް މެދުވެރިކޮށް އެކަން ކުރެވޭނެ ކަން ފާހަގަކުރައްވާފައެވެ. އަދި އެކަން ޑިޖިޓަލައިޒް ކުރެވުމަކީ ހަރަދުކުޑަކުރުމަށް އެޅޭނެ މުހިންމު ފިޔަވަޅެއް ކަމަށް ވެސް ޒާހިދު ވިދާޅުވިއެވެ.
[ކައުންސިލް އިންތިހާބު] އެ އިންތިހާބަށް ކުރިމަތިލުމަށް ކަރުދާސް ފޯމު ހުށަހެޅުމުގެ ބަދަލުގައި، އީސީގެ ޕޯޓަލް މެދުވެރިކޮށް އެ މަރުހަލާ އޮންލައިން ކުރެވިގެންދާނެ. މިއީ އިދާރީ އިންތިޒާމްތައް ފަސޭހަކުރުމަށް ގެނައި ބަދަލެއް ކަމަށެވެ. އަދި ހަރަދުކުޑަކުރުމަށް އެޅޭނެ މުހިންމު ފިޔަވަޅެއް.
އިލެކްޝަންސް ކޮމިޝަނުގެ ރައީސް މުޙައްމަދު ޒާހިދު
ޒާހިދު ވަނީ އިންތިހާބުގެ އިދާރީ މަސައްކަތްތަކާއި ގުޅޭ ގޮތުން ވެސް މައުލޫމާތު ދެއްވާފައެވެ. އެގޮތުން އިންތިހާބުގެ އިދާރީ މަސައްކަތްތަކަށް 270 އެއްހާ މުވައްޒަފުން ބޭނުންވާނެ ކަމަށާއި، މިހާރު ވެސް އެ މުވައްޒަފުން ހޯދުމަށް ކުރަންޖެހޭ މަސައްކަތްތައް ކުރަމުންދާ ކަމަށް ޒާހިދު ވިދާޅުވިއެވެ.
ޒާހިދު ވިދާޅުވީ ޓްރެއިނަރުންގެ ގޮތުގައި ވެސް 110 މީހުން ބޭނުންވާ ކަމަށާއި މިހާރު ކުރިޔަށްދަނީ އިންތިހާބަށް ބޭނުންވާ މުވައްޒަފުންގެ ގޮތުގައި ކުރިމަތިލައިފައިވާ ފަރާތްތަކުގެ އިންޓަވިއުގެ މަސައްކަތް ކަމަށެވެ.
ރައްޔިތުންގެ ހޭލުންތެރިކަން އިތުރުކުރުމަށް ވެސް ގިނަ މަސައްކަތްތަކެއް ކުރާ ކަމަށާއި، އީސީގެ ޓީމުތައް އެ ރަށްތަކަށް ޒިޔާރަތްކޮށް އެ މަސައްކަތްތައް ކުރާނެކަން ވެސް ޒާހިދު ވަނީ ފާހަގަކުރައްވާފައެވެ.
Advertisement
This content is created and paid for by advertisers and does not involve Voice Journalists
