ހުޅުމާލޭ ފޭސް ދޭއްގައި އިމާރާތްކުރަމުން އަންނަ ޝަހީދު އަލީ ސްކޫލަށް ވަންނަން ބޭނުންވާ ދަރިވަރުންނަށް ފުރުސަތު އެޑިއުކޭޝަން މިނިސްޓްރީން މިއަދު އާއްމުކޮށް ހުޅުވާލައިފިއެވެ.

އެޑިއުކޭޝަން މިނިސްޓްރީން މިއަދު ބުނީ، ޝަހީދު އަލީ ސްކޫލްގެ ގްރޭޑް 1 ކުން 10 އަކަށް ދަރިވަރުން ވެއްދުމަށް މިހާރު ހުޅުވާާފައިވާކަމަށެވެ. އެގޮތުން މިހާރު މާލެ ސަރަހައްދު ހިމެނޭހެން ދިވެހިރާއްޖޭގެ ހުރިހާ ސްކޫލްތަކުން ޝަހީދު އަލީ ސްކޫލަށް ދަރިވަރުން ވެއްދުމަށް އެ ދަރިވަރަކު ކިޔަވަމުން އަންނަ ސްކޫލުން ފޯމް ހުށަހެޅޭނެކަމަށް އެޑިއުކޭޝަނުން ބުނެއެވެ.

މިނިސްޓްރީން ވަނީ މީގެ ކުރިން ޝަހީދު އަލީ ސްކޫލަށް ބަދަލުވާން ބޭނުންވާ ދަރިވަރުންނަށް މިދިޔަ މަހު އެ ފުރުސަތު ހުޅުވާލާފައެވެ. މީގެ ކުރިން ތައުލީމާބެހޭ ވަޒީރު ޑރ.އިސްމާއީލް ޝަފީއު ވިދާޅުވެފައިވަނީ، ޝަހީދު އަލީ ސްކޫލަށް ވަނުމަށް އެދި ވަރަށް ބޮޑު ޑިމާންޑެއް އެބައޮތްކަމަށާއި، ފޭސް ދޭކުން އެ ސްކޫލަށް ވަނުމަށް ބޭނުންވާ ހުރިހާ ކުދިންނަށް ޖާގަ ލިބޭނޭކަމަށެވެ.

ޝަހީދު އަލީ ސްކޫލްގެ ބޮޑު ބައެއް ވަނީ ނިމިފައި..

ޝަހީދު އަލީ ސްކޫލް އިމާރާތްކުރަން ފަށާފައިވަނީ 2023 ވަނަ އަހަރުގެ ޑިސެމްބަރުމަހުގެ ތެރޭގައެވެ. ޝަހީދު އަލީ ސްކޫލަކީ 1500 ދަރިވަރުންގެ ޖާގައިގެ ސްކޫލެކެވެ. މި ސްކޫލުގައި 54 ކްލާސްރޫމް ހުންނައިރު، ކުރިއަށްއޮތް ދިރާސީ އަހަރު އެ ސްކޫލުގެ ކިޔެވުން ފަށާނޭކަމަށް އެޑިއުކޭޝަނުން ވަނީ ބުނެފައެވެ. 

ހުޅުމާލޭ ފޭސް ދޭއްގައި ދާއިމީ ސްކޫލެއްގެ ގޮތުގައި މިހާތަނަށް ބިނާކޮށްފައިވަނީ ސަލާހުއްދީން ސްކޫލް އެކަންޏެވެ. ވަގުތީ ސްކޫލެއްގެ ގޮތުގައި ކާމިލްދީދީގައި ކިޔަވައިދެމުން ދިޔަނަމަވެސް ފޭސް ދޭއްގެ ވަރަށްގިނަ ކުދިން އަދިވެސް ކިޔަވަންދަނީ ފޭސް އެކެއްގައި ހުންނަ ސްކޫލްތަކުގެ އިތުރުން މާލޭގެ ސްކޫލްތަކަށެވެ. އެގޮތުން ހުޅުމާލޭގެ ދެވަނަ ފޭހުން އެކަނިވެސް މާލެއަށް 900 އެއްހާ ކުދިން ކިޔަވަންދާކަމަށް އެޑިއުކޭޝަން މިނިސްޓަރު ވަނީ ވިދާޅުވެފައެވެ.