މިއަދު ރާއްޖޭގެ އެކި ސަރަހައްދުތަކަށް ވައި ބާރުވެފައި ކަނޑުތައް ގަދަވާނޭކަމަށް މޫސުމާ ބެހޭ ޤައުމީ އިދާރާއިން ލަފާކޮށްފިއެވެ.

މެޓް އޮފީހުން މިއަދުވެސް ލަފާކޮށްފައިވަނީ ރާއްޖޭގެ ބޮޑު ސަރަހައްދަކަށް މޫސުން ގޯސް ދުވަހެއްގެ ގޮތުގައެވެ. އެގޮތުން ކ އަތޮޅުން ފެށިގެން އައްޑޫސިޓީއަށް ވަނީ ވައިޓް އެލާޓް ނެރެފައެވެ. 

މެޓް އޮފީހުން ބުނީ މިއަދު ހެނދުނު 07:30 ހުން ފެށިގެން މެންދުރު 13:30 ހާ ހަމަޔަށް ވައިޓް އެލާޓް ނެރެފައިވާ ސަރަހައްދުތަކަށް ބޯކޮށް ވާރޭވެހުމާއެކު ގުގުރާނޭކަމަށެވެ. މީގެ އިތުރުން އެ ގަޑިތަކުގައި ވިލާގަނޑުގައި ގަޑިއަކު 45 މޭލު ބާރުމިނުގައި ވައިޖެހޭނޭކަމަށް ވަނީ ލަފާކޮށްފައެވެ. 

ހިނގަމުން މިދަނީ ހުޅަނގު މޫސުމުގެ ވައި އެނބުރޭ ނަކަތް ކަމަށްވާ "ހެއި" ނަކަތެވެ. މި ނަކަތުގައި ވައިބާރުވެފައި އެކިފަހަރު ވައި ޖެހޭނީ އެކި ދިމާއިންނެވެ.

މިދުަވސްވަރަކީ މޫސުން ގޯސް ދުވަސްވަރެއްކަމުން ހާއްސަ ގޮތެއްގައި ކަނޑު ދަތުރުކުރާ ފަރާތްތަކުން މޫސުމަށް ސަމާލުވުމަށް ކަމާބެހޭ އިދާރާތަކުން ވަނީ އިލްތިމާސްކޮށްފައެވެ. މޫސުން ގޯސްވުމުގެ ސަބަބުން މިދިޔަ ދުވަސްތަކުގައި ކަނޑުމަތީގެ ވަރަށް ނުރައްކާތެރި ދެ ހާދިސާއެއް ވަނީ ހިނގާފައެވެ. މި ހާދިސާތަކުގައި ކަނޑުވި ބައެއް މީހުންގެ ފުރާނަ ގެއްލިފައިވާކަން ފާހަގަކޮށްލެވެއެވެ.