ވޯލްޑް ޓޫރިޒަމް އެވޯޑްސް 2025 ގެ ބެސްޓް ބީޗް ޑެސްޓިނޭޝަން އެވޯޑް ރާއްޖެއަށް ލިބިއްޖެއެވެ.
މި އެވޯޑް ރާއްޖެއަށް އަރުވާފައިވަނީ ބެލްޖިއަމްގެ ވެރިރަށް ބްރަސަލްސްގައި މިއަދު ބޭއްވި ޚާއްޞަ ހަފުލާއެއްގައެވެ.
ރާއްޖޭގެ ޗާލު ހުދު ދޮންވެލީގެ ގޮނޑުދޮށްތަކާއި، ސާފު ރީތި މޫދާއި، ފަރުތަކުގެ ދިރުމުގެ މައްޗަށް ބަލައި ދީފައިވާ މި އެވޯޑާ ހަވާލުވެވަޑައިގަތީ ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ ފަރާތްޕުޅުން ސްޕެޝަލް އެންވޯއީ އޮފް ދަ ޕްރެޒިޑެންޓް އަދި ކުރީގެ ރައީސް، ޑރ މުޙައްމަދު ވަޙީދު ޙަސަނެވެ.
މި ހަފުލާގައި ވާހަކަފުޅު ދައްކަވަމުން ޑރ މުޙައްމަދު ވަޙީދު ޙަސަން ވަނީ މި ފަޚުރުވެރި އެވޯޑު ލިބުމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ނަންފުޅުގައި ޝުކުރު އަދާކުރައްވާފައެވެ.
"ރީޑިފައިނިންގ ޓުއަރިޒަމް އިން އަ ޗޭންޖިންގ ވަރލްޑް" މި ޝިޢާރުގެ ދަށުން ކުރިއަށްގެންދާ މިއަހަރުގެ ގްލޯބަލް ޓުއަރިޒަމް ފޯރަމް އެނުއަލް މީޓިންގ އަކީ ދުނިޔޭގެ ފަތުރުވެރިކަމުގެ ދާއިރާގެ އެންމެހާ ހިއްސާދާރުން އެއްތަނަކަށް ޖަމާވެ، ސިނާޢަތުގެ މުސްތަޤްބަލު ބައްޓަންކުރުމަށް މަޝްވަރާކުރާ މުހިންމު ބައްދަލުވުމެކެވެ.
ފާހަގަކޮށްލެވޭ ކަމަކީ ރާއްޖޭގެ ކަނޑުފަޅުގެ މާހައުލުގެ ގުދުރަތީ ދިރުންތައް ދެމެހެއްޓުމަށް މަސައްކަތްކުރާ ދުނިޔޭގެ އެންމެ މަޤުބޫލު އެއް މަންޒިލު ކަމުގައިވުމާއެކު، މިފަދަ ފަޚުރުވެރި އެވޯޑެއް ލިބުމަކީ ދިވެހިރާއްޖޭގެ ފަތުރުވެރިކަމުގެ ސިނާޢަތަށް ލިބިގެންދިޔަ އިތުރު ކުރިއެރުމެކެވެ.
Advertisement
This content is created and paid for by advertisers and does not involve Voice Journalists
