ޖަޕާނުގެ ފުރަތަމަ އަންހެން ބޮޑު ވަޒީރަށް ރައީސް ތަހުނިޔާ ދަންނަވައިފި
ޖަޕާނުގެ ފުރަތަމަ އަންހެން ބޮޑު ވަޒީރުގެ މަޤާމަށް އިންތިޚާބު ވެވަޑައިގެންނެވި ތަކައިޗި ސަނާއެއަށް ރައީސް ޑރ. މުޙައްމަދު މުޢިއްޒު ތަހުނިޔާ ދަންނަވައިފިއެވެ.
"އެކްސް" ގައި ކުރެއްވި ޕޯސްޓެއްގައި ރައީސް ވިދާޅުވީ، ޖަޕާނުގެ ފުރަތަމަ އަންހެން ބޮޑު ވަޒީރުގެ މަޤާމަށް އިންތިޚާބުވެވަޑައިގަތުމުން ތަކައިޗި ސަނާއެއަށް ތަހުނިޔާ ދަންނަވާ ކަމަށެވެ. މި ޕޯސްޓުގައި ރައީސް ވަނީ، ސަރުކާރުގެ ޚިދުމަތުގައި ތަކައިޗި ސަނާއެ ހޯއްދަވާފައިވާ ތަޖުރިބާއާއެކު ޖަޕާނު އިތުރު ކުރިއެރުންތަކެއް ހޯއްދަވާނެ ކަމުގެ ފުރިހަމަ ޔަޤީންކަން އޮތް ކަމަށް ވިދާޅުވެފައެވެ.
އަދި ދިވެހިރާއްޖެއާއި ޖަޕާނާ ދެމެދު އޮތް ޒަމާންވީ އެކުވެރިކަމުގެ ގުޅުން އިތުރަށް ހަރުދަނާކުރުމަށް ތަކައިޗި ސަނާއެ އާއި އެ ސަރުކާރާއެކު މަސައްކަތްކުރުމަށް އިންތިޒާރުކުރައްވާ ކަމަށްވެސް ރައީސް ވިދާޅުވެފައިވެއެވެ.
ރާއްޖެ އާއި ޖަޕާނާއި ދެމެދު ޚާރިޖީ ގުޅުން ޤާއިމްކުރީ 1967 ވަނަ އަހަރުއެވެ. ޖަޕާނަކީ ރާއްޖޭގެ ތަރައްޤީއަށް އެހީތެރިވެދޭ އެންމެ މުހިންމު އެއް ޤައުމެވެ.
Advertisement
This content is created and paid for by advertisers and does not involve Voice Journalists
