1447 ވަނަ އަހަރު ހައްޖުގެ އަޅުކަން އަދާކުރުމަށް ގަސްތުކުރާ ފަރާތްތަކުން ޞިއްޙީގޮތުން ފުރިހަމަވާންޖެހޭ ޝަރުޠުތަކަށް ސަމާލުވުމަށް އިސްލާމީ ކަންތައްތަކާއި ބެހޭ ވުޒާރާއިން އެދިއްޖެއެވެ.

ސައުދީ ސަރުކާރުން ވަނީ އަންނަ އަހަރުގެ ހައްޖު މޫސުމުގައި ބޮޑެތި ބަލިތައް ހުންނަ މީހުންނަށް ހައްޖުވިސާ ނުދޭގޮތަށް ނިންމާފައެވެ. އެކަންކަން ގޮތަށް ނިންމާފައިވަނީ ހައްޖަށްދާ މީހުންނަށް ހައްޖުގެ އަޅުކަން އެންމެ ފުރިހަމަ ގޮތުގައި އަދާކުރުމަށް ކުރަމުންގެންދާ މަސައްކަތުގެ ތެރެއިންނެވެ. ސައުދީ ސަރުކާރުން ވަނީ އެކުލަވާލި އުސޫލްތައް ޙައްޖުވެރިން ދަތުރުކުރާ ޤައުމުތަކުގެ ކަމާބެހޭ އިދާރާތަކާ ހިއްސާކޮށްފައެވެ.

އިސްލާމީ ކަންތައްތަކާ ބެހޭ ވުޒާރާއިން އެ އުސޫލްތައް މިއަދު އާއްމުކޮށްފައެވެ. މިކަމާ ގުޅޭގޮތުން އިސްލާމިކް މިނިސްޓްރީން ވަނީ ސައުދީގެ ކަމާބެހޭ ފަރާތްތަކުން ކަނދައެޅި އުސޫލްތަކަށް ސަމާލުވުމަށް އިލްތިމާސްކޮށްފައެވެ.

- ފުއްޕާމޭގެ ބައްޔެއްގެ ސަބަބުން ދާއިމީކޮށް އޮކްސިޖަން ބޭނުންކުރަންޖެހޭ މީހުން

- ފުރަމޭގެ ސިރޯސިސް ތަޙައްމަލްކުރާ މީހުން

- ކިޑްނީ ފެއިލްވެގެން ޑައިލަސިސް ހަދާމީހުން

- ނަފްސާނީ ބަލީގެ ސަބަބުން ވިސްނުމަށް ނުވަތަ ބުއްދިއަށް އަސަރުކޮށްފައިވާ މީހުން

- ޑިމެންޝިއާ ތަހައްމަލުކުރަމުންދާ މީހުން

- ވިހެއުމުގެ ރިސްކު އޮންނަ މީހުން

- ކީމޯ ތެރަޕީ ނުވަތަ ބަޔޮލޮޖިކަލް ތެރަޕީ ނަގަމުންދާ ކެންސަރު ބަލީގެ މީހުން

- ޓީބީ އާއި ހެމަރޭޖިކް ފީވަރ ފަދަ ޢާންމު ޞިއްޙަތަށް ނުރައްކާވެދާނެ ބަލިތައް ޖެހިފައިވާ ފަރާތްތައް 

މިކަމާ ގުޅިގެން ހައްޖު ކޯޕަރޭޝަނުގެ މެނޭޖިން ޑިރެކްޓަރު މުހައްމަދު ޝަކީލްވިދާޅުވެފައިވަނީ ހައްޖަށްދިއުމަށް ފުރުސަތު ލިބޭ ފަރާތްތަކަށް ދުރާލައި މެޑިކަލް ޓެސްޓްތައް ހެދުމަށް އަންގާނެކަމަށް ވިދާޅުވެފައެވެ. އެގޮތުން ސައުދީން ވިސާލިބުމުގެ ކަންކަން ހަމަޖައްސަނީ އެ ރިޕޯޓްތަކުގެ ނަތީޖާތަކަށް ބަލައިގެންކަމަށްވެސް އޭނާ ވަނީ ވިދާޅުވެފައެވެ.