ޔުއެފާ ޔޫރޮޕާ ލީގްގައި އެސްޓަން ވިލާ އާއި މެކަބީ ތެލްއަވީވް ބައްދަލުކުރާ މެޗަށް އިސްރާއީލް ދިދަ ވެއްދުން މަނާކޮށްފިއެވެ.
ޔޫރަޕާ ލީގްގައި އަންނަ ނޮވެމްބަރުމަހުގެ 7 ވަނަ ދުވަހު މި ދެޓީމް ކުޅުމަށް ހަމަޖެހިފައިވާ މެޗާހެދި އިނގިރޭސިވިލާތާއި އިސްރާއީލްގެ ގުޅުން ވަނީ ވަރަށްބޮޑަށް ގޯސްވެފައެވެ.
ދެ ޤައުމުގެ ގުޅުން ގޯސްވެފައިވަނީ އިނގިރޭސިވިލާތުގައި ކުޅުމަށް ހަމަޖެހިފައިވާ މެޗަށް އިސްރާއީލްގެ ސަޕޯޓަރުން ނުވެއްދުމަށް އެސްޓަން ވިލާއިން ނިންމުމާ ގުޅިގެންނެވެ. އެޓީމުން އެގޮތަށް ނިންމީ މެކަބީ ތެލް އަވީވްގެ ސަޕޯޓަރުން ދަނޑަށް ނުވެއްދުމަށް ވެސްޓް މިޑްލޭންޑްގެ ޕޮލިހުން އެންގުމާ ގުޅިގެންނެވެ. ފުލުހުން އެގޮތަށް ނިންމީ އިސްރާއީލް ސަޕޯޓަރުންނާހެދި ސްޓޭޑިއަމްގައި ހަމަނުޖެހުމެއް އުފެދިދާނެތީއެވެ. އެންމެފަހުން ނެދަލޭންޑްސްގައި އަޔެކްސްއާ އިސްރާއީލްގެ ޓީމަކާ ކުޅުނު މެޗްގައި ސަޕޯޓަރުންގެ މެދުގައި ވަނީ ބޮޑެތި ހަމަނުޖެހުންތަކެއް ހިނގާފައެވެ.
މި މައްސަލާގައި އިސްރާއިލް ސަރުކާރުން ވަނީ އެކަން އަނބުރާ ގެންދިއުމަށް އިނގިރޭސި ސަރުކާރަށް ޕްރެސަރުކޮށްފައެވެ. ނަމަވެސް އިސްރާއީލުން ބޭނުންވާގޮތަށް ކަންކަން ކުރެވެން ނެތްކަމަށް ވެސްޓް މިޑްލޭންޑްގެ ފުލުހުން ވަނީ ތަކުރާރުކޮށް ބުނެފައެވެ. ސިޔާސީގޮތުން ކުރިމަތިވި ޕްރެޝަރުތަކާހެދި އެންމެފަހުން އެސްޓަން ވިލާއިން ވަނީ ހަރުކަށި އުސޫލްތަކެއް އެކުލަވާލައި، މެކަބީގެ ސަޕޯޓަރުންނަށް ދަނޑަށް ވަދެވޭނެ ހަރުކަށި އުސޫލެއް ހަދާފައެވެ. އެގޮތުން އެމީހުންނަށް ދަނދަށް ވަދެވުނަސް ޓިކެޓް ވިއްކާ އުސޫލްތައް ވަނީ ވަރަށް ހަރުކަށިކޮށްފައެވެ.
އެގޮތުން ޓިކެޓް ގަންނަ ފަރާތަކީ އާއްމުކޮށް ދަނޑަށް ވަންނަ ރަނގަޅު ރެކޯޑެއް އޮންނަ ފަރާތަކަށް ވާންޖެހެއެވެ. އަދި އެމީހަކު އިންނަން ޖެހޭނީ އެމީހަކު ގަތް ޓިކެޓްގައިވާ ގޮނޑީގައެވެ. ޓިކެޓް އެހެން މީހަކަށް ބަދަލެއް ނުކުރެވޭނެއެވެ. މީގެ އިތުރުން އެސްޓަން ވިލާއިން ވަނީ ދަނޑަށް ދިދަ އާއި އެކި އެއްޗެހި ރަމްޒުކޮށްދޭ ބެނާތަކާއި ޕޯސްޓަރުތައް ވެއްދުން މަނާކޮށްފައެވެ.
ޣައްޒާ ހަނގުރާމައާ ގުޅިގެން މުޅި ޔޫރަޕްގައިވެސް ވަނީ ޔަހޫދީންނާ ދެކޮޅު ހަރަކާތްތަކެއް ފަށާފައެވެ. މީގެ ތެރޭގައި ކުޅިވަރު ދަނޑުތަކުގައިވެސް އިސްރާއީލާ ދެކޮޅު ހަރަކާތްތައް ހިންގަމުންދެއެވެ. އިސްރާއީލާ ދެކޮޅު ފަރާތްތަކުން ބުނަމުންދަނީ ބައިނަލްއަޤްވާމީ ކުޅިވަރު ދަނޑުތަކުން އިސްރާއީލަށް ނިސްބަތްވާ ޓީމުތައް ބޭރުކުރަން ޖެހޭކަމަށާއި، އެމީހުން ދަނީ ޣައްޒާގައި ކުޑަކުދިންނާއި އަންހެނުން ގަތުލުކުރަމުންކަމަށެވެ.
Advertisement
This content is created and paid for by advertisers and does not involve Voice Journalists
