އައްޑޫ ސިޓީއަށް ދިމާވެފައިވާ ކަރަންޓުގެ މައްސަލަ ޙައްލުކުރުމަށް އައު ދެ ޖެނެރޭޓަރެއް ފެނަކައިން ގެނެސްފިއެވެ.

މީޑިޔާތަކަށް ފެނަަކައިން ބުނީ، އައްޑޫއަށް ގެންދިޔުމަށް ރޭ މާލެ ގެނެސްފައިވަނީ ކަމިންސް ބްރޭންޑްގެ 1.8 މެގަވޮޓްގެ މި ދެޖަނަރޭޓަރު ކަމަށާއި، އެ ޖެނެރޭޓަރުތައް އައްޑޫއަށް ގެންދިޔުމުގެ މަސައްކަތް މިހާރު ކުރަމުންދާކަމަށް ފެނަކައިން ބުންޏެވެ.

އެ ދެ ޖެނެރޭޓަރުގެ އިތުރަށް، 1.6 މެގަވޮޓްގެ އިތުރު ޖެނެރޭޓަރެއް ވެސް އައްޑޫއަށް ގެންދިޔުމަށް ހަމަޖެހިފައިވާ ކަމަށް ވެސް ފެނަކައިން ބުންޏެވެ. 

އަދި މީގެ އިތުރުން އައްޑޫގެ ސިޓީއަށް ދިމާވެފައިވާ ކަރަންޓްގެ މައްސަލައަށް ދާއިމީ ހައްލެއް ހޯދުމުގެ މަސައްކަތް ވެސް އަންނަނީ ކުރަމުން ކަމަށް ވެސް ފެނަކައިން ބުންޏެވެ.

މައިގަނޑު ގޮތެއްގައި އައްޑޫގެ ގުޅިފައިވާ ރަށްތަކުން ކަރަންޓު ކެޑޭ މައްސަލަ ވަނީ ވަރަށް ބޮޑުވެފައެވެ. އެކަމާއި ގުޅިގެން މަޖިލީހަށް ވެސް ކުއްލި ގިނަ މައްސަލަތަކެއް ހުށަހަޅައިފައިވެއެވެ.

އެކަމާއި ގުޅިގެން ފެނަކައިން އޭރު ބުނި ގޮތުގައި އައްޑޫއަށް ކަރަންޓުގެ މައްސަލަ ދިމާވެފައިވަނީ މިދިޔަ ސަރުކާރުން އެ ސިޓީގެ ކަރަންޓު ގެތަކާއި ޖެނެރޭޓަރުތައް މަރާމާތުނުކޮށް ގިނަ ދުވަސްވުމުންނެވެ.