ޕެންޝަން ބޯޑުގެ މެންބަރުކަމުން މީރާގެ ކުރީގެ ޗެއާމަން ސަރުވަޝް އާދަމް އިސްތިއުފާ ދެއްވަން ނިންމެވި ނިންމެވުމަށް އިދިކޮޅު އެމްޑީޕީގެ ރައީސް އަބްދުﷲ ޝާހިދު ތަޢުރީފުކުރައްވައިފިއެވެ.
ޕެންޝަން ބޯޑުން އިސްތިއުފާދެއްވަން ނިންމެވިކަން ސަރުވަޝް ހާމަކުރެއްވީ މިއަދު "އެކްސް"ގައި ކުރެއްވި ޕޯސްޓެއްގައެވެ. އެ ޕޯސްޓުގައި ސަރުވަޝް ވިދާޅުވި ގޮތުގައި އެ މަގާމުން އިސްތިއުފާދެއްވަން ނިންމައިފައިވަނީ މަރުކަޒީ ބޭންކް، އެމްއެމްއޭއާ އެކު ޕެންޝަން އޮފީހުން ހިންގަން ނިންމައިފައިވާ ފައިސާގެ މުއާމަލާތާއި ގުޅިގެންކަމަށެވެ.
އަދި އެ މުއާމަލާތަކީ އިގްތިސާދީ ގޮތުންނާއި މާލީ ގޮތުން ވެސް ގެއްލުން ބޮޑު މުއާމާލާތެއް ކަމަށް ޤަބޫލުކުރައްވާ ކަމަށް ވެސް އެ ޕޯސްޓުގައި ސަރުވަޝް ވިދާޅުވެފައިވެއެވެ.
ސަރުވަޝްގެ އެ ޕޯސްޓަށް އިޝާރަތްކުރައްވަމުން ކުރީގެ ޚާރިޖީ ވަޒީރުކަން ކުރެއްވި ޝާހިދު ވިދާޅުވީ، ސަރުވަޝްގެ އެ ނިންމެވުމަކީ އާންމުންގެ އިތުބާރާއި އަމާނާތްތެރިކަމުގެ ޒިންމާއަށް އުނިކަން އަންނަ ފަދަ އަމަލުތަކާއި ދެކޮޅަށް އެޅުއްވި މުހިންމު ފިޔަވަޅެއް ކަމަށެވެ.
އަދި އެފަދަ "ތެދުވެރި" ނިންމެވުންތަކަކީ ވަރަށް މަދުން ފެނުނު ނަމަވެސް، ނުހަނު ބޮޑަށް ބޭނުންވެފައިވާ ކަންކަން ކަމަށާއި، ސަރުވަޝްގެ އެ ނިންމެވުމަކީ ޤައުމީ މުއައްސަސާތައް ހިނގަންވާނީ ޖަވާބުދާރީވުމުގެ މައްޗަށްކަން ހަނދާންކޮށްދޭ ކަމެއް ކަމަށް ޝާހިދު ވިދާޅުވިއެވެ.
އަދި އާންމު ވާޖިބުތަކާ ހަވާލުވެފައިވާ ކޮންމެ ފަރުދަކު ވެސް އަދި ހުރިހާ މުުސްތަޤިއްލު މުއައްސަސާތަކެއް ވެސް، އެފަދައިން ޢަމަލުކުރުމުގެ ހިތްވަރު ހޯދަންވާނެ ކަމަށް ޝާހިދު ވިދާޅުވިއެވެ.
ފިނޭންސް މިނިސްޓްގެ ޗީފް ފައިނޭންޝަލް ބަޖެޓް އެގްޒެކެޓިވްގެ މަގާމުގައި ވެސް ހުންނެވި ސަރުވަޝް ޕެންޝަން ބޯޑުން އިސްތިއުފާ ދެއްވައިފައިވާއިރު، ޕެންޝަން އޮފީސް މެދުވެރިކޮށް އެމްއެމްއޭއިން ސެކަަންޑްރީ މާކެޓުގައި 2.5 ބިލިއަން ރުފިޔާގެ ބޮންޑެއް ވިއްކާކަމަށް ބުނެ ވާހަކަތަކެއް ދަނީ ފެތުރެމުންނެވެ. އެކަމާއި ގުޅިގެން ފިނޭންސް މިނިސްޓްރީ، އެމްއެމްއޭ އަދި ޕެންޝަން އޮފީހުން ވެސް ރަސްމީ އެއްޗެއް ބުނެފައެއް ނުވެއެވެ.
Advertisement
This content is created and paid for by advertisers and does not involve Voice Journalists
