ކ. ގުރައިދޫ މެޖިސްޓްރޭޓް ކޯޓުގެ އިސް މެޖިސްޓްރޭޓް ފަތުހުﷲ ޖަމީލް މޫސާ، މުސާރަ ނުލިބޭ ގޮތަށް ސަސްޕެންޑް ކުރަން ޖުޑިޝަލް ސާވިސް ކޮމިޝަން (ޖޭއެސްސީ) އިން ނިންމައިފިއެވެ.
ޖޭއެސްސީން އެގޮތަށް ނިންމީ ފަތުހުﷲ ޖަމީލާ ގުޅޭ ގޮތުން ހުށަހެޅި މައްސަލައެއް ތަޙްޤީޤުކުރުމަށް ފަހުގައެވެ. ނަމަވެސް، މިހާރު ހުށަހެޅިފައިވާ މައްސަލައަކީ ކޮބައިކަމެއް ޖޭއެސްސީން ހާމަކޮށްފައެއް ނުވެއެވެ.
މީގެ ކުރިންވެސް ފަތުހުﷲ ޖަމީލްގެ މައްސަލައެއް 2023 ވަނަ އަހަރު ޖޭއެސްސީން ބަލާފައިވެއެވެ. އެއީ ޖިނާއީ އިޖުރާތުގެ ގާނޫނާ ޚިލާފުވެފައިވާ ކަމަށް ބުނެ އެ ކޮމިޝަނަށް އޭރު ހުށަހެޅުނު ސުލޫކީ މައްސަލައެކެވެ.
ނަމަވެސް، ޖޭއެސްސީން ވަނީ އެ އަހަރުގެ ތެރޭގައި އެ މައްސަލަ ނުބަލަން ނިންމައިފައެވެ. އެ މައްސަލައާ ގުޅިގެން ޖޭއެސްސީން އޭރު ބުނީ، އެ ކޯޓަށް ހުށަހެޅި ގަޒިއްޔާއެއްގެ އަޑުއެހުމުގައި ދައުވާއަކަށް އިއުތިރާފުވެފައިވީ ނަމަވެސް، އެ ގަޒިއްޔާއަކީ 'އަވަސް ނިޔާ' ގައި ކުރިއަށް ގެންދަންޖެހޭ މައްސަލައެއް ނޫންކަމަށް ނިންމައިފައި އޮތީ ގާނޫނާ ޚިލާފަށް ކަމަށް ބެލެވެން ނެތްކަމަށެވެ.
Advertisement
This content is created and paid for by advertisers and does not involve Voice Journalists
