ކަންކަމުގައި "ނޫނެކޭ" ބުނަން ނުކުރޭނަމަ ޕެންޝަން އޮފީހުގެ ބޯޑު މެންބަރުންނާއި އެމްއެމްއޭގެ ބޯޑު މެންބަރުން އިސްތިއުފާ ދިނުމަށް އެމްޑީޕީގެ ޗެއާޕާސަން ފައްޔާޒު އިސްމައީލް ވިދާޅުވެއްޖެއެވެ.
މަރުކަޒީ ބޭންކް، އެމްއެމްއޭއާ އެކު ޕެންޝަން އޮފީހުން ހިންގަން ނިންމައިފައިވާ ފައިސާގެ މުއާމަލާތާއި ގުޅިގެން ރޭ "އެކްސް"ގައި ކުރެއްވި ޕޯސްޓެއްގައި ސަރުކާރަށް ވަރަށް ބޮޑަށް ފާޑު ވިދާޅުވަމުން ފައްޔާޒު ވިދާޅުވީ، އެއާޕޯޓު ހިންގަން އުފެއްދި އެމްއޭސީއެލް ފުނޑާލައި، ސެންޓްރަލް ބޭންކާއި ބީއެމްއެލް އެއްކޮށް ލޫޓުވާލައި ނިންމާލުމަށްފަހު މިހާރު ސަރުކާރުން އަމާޒު ހިފާފައި ހުރީ ސީދާ ރައްޔިތުންގެ ޕެންޝަން ފަނޑު ދޮވެލުމަށް ކަމަށެވެ.
އަދި ގާނޫނާ ހިލާފަށް ސަރުކާރު ކުރަމުންދާ ކަންކަމުގައި ބައިވެރިނުވުމަކީ ކޮންމެ މުވައްޒަފެއްގެ މައްޗަށް މިއަދު އޮތް ޒިންމާއެއް ކަމަށާއި، ސަރުކާރު ދެކެ ބިރުން ނުވަތަ ޒާތީ މަންފާއަކަށް ގައުމާއި ރައްޔިތުންނަށް ގެއްލުންދިނުމުގައި ބައިވެރި ވުމަކީ އުޒުރެއް ނޫން ކަމަށެވެ.
"ދިވެހިންގެ މުސްތަގުބަލު ފޭރިގަތުމުގައި ބައިވެރިނުވެ، އެކަމަށް ނޫނެކޭ ބުނަން ނުކެރޭނަމަ އެމްއެމްއޭ އާއި ޕެންޝަން އޮފީހުގެ ބޯޑުގެ މެންބަރުން އިސްތިއުފާ ދިނުމަށް ގޮވާލަން. ގައުމާއި ރައްޔިތުންނަށް އިއާދަނުކުރެވޭނެ ގެއްލުން ދިނުމުގައި ބައިވެރިވާ ފަރާތްތައް ރައްޔިތުން ނުކުމެ ޖަވާބުދާރީ ކުރުވާނެ، ޒިންމާކުރުވާނެ،" ފައްޔާޒ ވިދާޅިވިއެވެ.
ފައްޔާޒު އެފަދައިން ވިދާޅުވިއިރު، ޕެންޝަން އޮފީސް މެދުވެރިކޮށް އެމްއެމްއޭއިން ސެކަަންޑްރީ މާކެޓުގައި 2.5 ބިލިއަން ރުފިޔާގެ ބޮންޑެއް ވިއްކާކަމަށް ބުނެ ދެކެވޭ ވާހަކަތަކާއެކު ޕެންޝަން އޮފީހުގެ ބޯޑުގައި އިންނެވި މީރާގެ ކުރީގެ ޗެއާމަން ސަރުވަޝް އާދަމް ވެސް ވަނީ އެ ބޯޑުން އިސްތިއުފާ ދެއްވާފައެވެ.
އެގޮތުން އެ މަގާމުން އިސްތިއުފާދެއްވަން ނިންމައިފައިވަނީ މަރުކަޒީ ބޭންކް، އެމްއެމްއޭއާ އެކު ޕެންޝަން އޮފީހުން ހިންގަން ނިންމައިފައިވާ ފައިސާގެ މުއާމަލާތާއި ގުޅިގެން ކަމަށް ސަރުވަޝް ވިދާޅުވެފައިވާއިރު، އެ މުއާމަލާތަކީ އިގްތިސާދީ ގޮތުންނާއި މާލީ ގޮތުން ވެސް ގެއްލުން ބޮޑު މުއާމާލާތެއް ކަމަށް ޤަބޫލުކުރައްވާ ކަމަށް ވެސް ސަރުވަޝް ވަނީ ވިދާޅުވެފައެވެ.
އެ މުއާމަލާތާއި ގުޅިގެން އިދިކޮޅުން ވެސް ކަންބޮޑުވުން ފާޅުކުރަމުންދާއިރު، އެ މަގާމުން ސަރުވަޝް އިސްތިއުފާދެއްވުމާއި ގުޅިގެން އިދިކޮޅު ލީޑާޝިޕުން ވަނީ އޭނާއަށް ތައުރީފު ވެސް ކޮށްފައެވެ.
އިތުރަށް ކިޔާލަން: https://voice.mv/43935
Advertisement
This content is created and paid for by advertisers and does not involve Voice Journalists
