ކުރީ ވެރިކަމުގައި ގޯސްކަމެއް ހިންގުމަކީ މި ވެރިކަމުގައި އެކަން ކުރަން އޮތް ހުއްޖަތެއް ނޫން: ނަޝީދު
ނިމިިދިޔަ ވެރިކަމުގައި ނުރަނގަޅުކަމެއް ހިންގާފައި އޮތުމަމީ މި ވެރިކަމާއި ދެން އަންނަ ވެރިކަމެއްގައި ވެސް އެކަން ކުރަން އޮންނަ ހުއްޖަތެއް ނޫން ކަމަށް ކުރީގެ ރައީސް މުޙައްމަދު ނަޝީދި މިއަދު ވިދާޅުވެއްޖެއެވެ.
އެކްސް"ގައި ކުރެއްވި ޕޯސްޓެއްގައި ރައީސް ނަޝީދު ވިދާޅުވީ، ނިމިިދިޔަ ވެރިކަމުގައި ނުރަނގަޅުކަމެއް ހިންގާފައި އޮތުމަމީ މި ވެރިކަމާއި ދެން އަންނަ ވެރިކަމެއްގައި ވެސް ހަމައެކަން، އެގޮތަށް ކުރަން އޮންނަ ހުއްޖަތެއް ނޫން ކަމަށެވެ.
އެއީ ވަކި ކޮންކަމެއްގެ ވާހަކަ ކަމެއް ރައީސް ނަޝީދު ހިއްސާކުރައްވައިފައިނުވެއެވެ.
ރައީސް ނަޝީދު އެފަދައިން ވިދާޅުވިއިރު، ޕެންޝަން އޮފީސް މެދުވެރިކޮށް އެމްއެމްއޭއިން ސެކަަންޑްރީ މާކެޓުގައި 2.5 ބިލިއަން ރުފިޔާގެ ބޮންޑެއް ވިއްކާކަމަށް ބުނެ ދެކެވޭ ވާހަކަތަކުގެ އަޑުތައް އަންނީ ގަދަވަމުންނެވެ.
އަދި އެކަމަކީ ފައިސާ ޗާޕުކުރުން ކަމުގައި ފާހަގަކޮށް، އިދިކޮޅު އެމްޑީޕީގެ ލީޑާޝިޕްގެ ބޭފުޅުންނާއި މަޖިލިސް މެންބަރުން ކަންބޮޑުވުން ފާޅުކުރަމުން އަންނައިރު، އެ މުއާމަލާތައި ގުޅިގެން ޕެންޝަން ބޯޑުގެ މެންބަރުކަމުން މީރާގެ ކުރީގެ ޗެއާމަން ސަރުވަޝް އާދަމް ވެސް ވަނީ އިސްތިއުފާ ދެއްވާފައެވެ.
އެގޮތުން އެ މުއާމަލާތަކީ އިގްތިސާދީ ގޮތުންނާއި މާލީ ގޮތުން ވެސް ގެއްލުން ބޮޑު މުއާމާލާތެއް ކަމަށް ޤަބޫލުކުރައްވާ ކަމަށް ސަރުވަޝް ވެސް ވަނީ ވިދާޅުވެފައެވެ.
އެހެން ނަމަވެސް ލ. އަތޮޅަށް ކުރެއްވި ދަތުރުފުޅުގެ ތެރެއިން ރައީސް ޑރ. މުޙައްމަދު މުޢިއްޒު ވަނީ ސަރުކާރުން ފައިސާ ޗާޕުކުރަން އުޅޭކަމަށް ބުނެ ދެކެވޭ ވާހަކަ ދޮގުކުރައްވާފައެވެ. އެގޮތުން ރައީސް ވިދާޅުވީ ރާއްޖޭގެ އިގްތިސާދު ހަރުދަނާ ކުރެއްވުމަށް ކުރައްވަމުން ގެންދަވާ މަސައްކަތުގެ ދަށުން، "ފުނިޖެހިފައިވާ" އެތައް ބިލުތަކަކަށް ފައިސާ ދެއްކެވުމުގެ ކަންކަން، ކުރިއަށް ގެންދަވާނެ ކަމަށެވެ.
އަދި އެކަން ކުރައްވާނީ އެމަނިކުފާނު ވައުދުވެވަޑައިގެންފައިވާ ގޮތަށް ފައިސާ ޗާޕުނުކުރައްވައި، ކަމަށް ވިދާޅުވެ އެކަމުގެ ޔަގީންކަން ދެއްވި އެވެ.
Advertisement
This content is created and paid for by advertisers and does not involve Voice Journalists
