ފީފާގެ ރައީސް ޖިއާނީ އިންފަންޓީނޯ މާދަމާ ރާއްޖެއަށް ވަޑައިގަންނަވާއިރު، ރައީސް ޑރ. މުޙައްމަދު މުޢިއްޒު އާއި އެކު ހާއްސަ ފުޓްބޯޅަ މެޗެއްގައި ބައިވެރިވެވަޑައިގަންނަވާގޮތަށް ހަމަޖެހިފައިވާކަމަށް އެފްއޭއެމުން ބުނެފިއެވެ.
19 އަހަރު ފަހުން ފީފާގެ ރައީސަކު މާދަމާ ރާއްޖެއަށް ވަޑައިގަންނަވާއިރު، އެ ދަތުރުފުޅުގައި ފީފާގެ ރައީސް އިންފަންޓީނޯ ރައީސް މުޢިއްޒުއާއި ބައްދަލުކުރައްވައި ފުޓްބޯޅަ ތަރައްގީކުރުމާއި ގުޅޭ ރަސްމީ މަޝްވަރާތައް ކުރައްވާނެއެވެ.
ފީފާގެ ރައީސްގެ މި ދަތުރުފުޅުގެ ތެރެއިން މާދަމާ ހަވީރު ގަލޮޅު ރަސްމީ ދަނޑުގައި ޚައްސަ ހަރަކާތްތަކެއް ކުރިޔަށް ގެންދިޔުމަށް ހަމަޖެހިފައިވެއެވެ. އެގޮތުން ރާއްޖެގެ ފުޓްބޯޅަ އެކަޑަމީތަކާއި، ޒުވާން ކުޅުންތެރިންގެ ހުނަރު ދައްކާލުމުގެ މެޗުތަކެއް އޮންނައިރު، ރައީސް މުޢިއްޒު އަދި އިންފަންޓީނޯ ބައިވެރިވެވަޑައިގަންނަވާ ޚާއްސަ މެޗެއް ވެސް މާދަމާ އޮންނާނެއެވެ.
މި މެޗުތައް ބަލާލުމަށް ފުޓްބޯޅަ އާއިލާއަށާއި ސަޕޯޓަރުންނަށް އެފްއޭއެމުން ވަނީ ދައުވަތު ދީފައެވެ.
އެފްއޭއެމްގެ ރައީސް އަހުމަދު ތޯރިގު (ޓޮމް) މީގެ ކުރިން ވިދާޅުވި ގޮތުގައި އިންފަންޓީނޯ ރާއްޖެއަށް ވަޑައިގަތުމަކީ ދިވެހި ފުޓްބޯޅައަށް ލިބޭ ވަރަށް މުހިންމު ކުރިއެރުމެކެވެ. އަދި މިއީ ތާރީހީ ދަތުރެއް ކަމުގައިވެސް އޭނާ ފާހަގަކުރެއްވިއެވެ.
"މި ދަތުރުގެ ސަބަބުން ރާއްޖޭގެ ފުޓްބޯޅަ ތަރައްގީއަށް ކުރާ މަސައްކަތަށް ހަލުވިކަން އަންނާނެ. އަދި ފީފާ އާއި އެފްއޭއެމްއާ ދެމެދު އޮތް ގުޅުން އިތުރަށް ބަދަހިވެގެން އަންނާނެ،" ތޯރިގު ވިދާޅުވި އެވެ.
އިންފަންޓީނޯގެ މި ދަތުރަކީ ރާއްޖޭގެ ފުޓްބޯޅަ އިތުރަށް ހަރުދަނާކޮށް ކުރިއެރުވުމަށް އާ އަޒުމަކާ އެކު މަސައްކަތް ކުރުމަށް ލިބޭ ހިތްވަރެއް ކަމަށް ތޯރިގު ވިދާޅުވިއެވެ. އަދި މިއީ އެ މަސައްކަތުގައި ފީފާގެ ފުރިހަމަ އެއްބާރުލުމާއި އެހީތެރިކަން އޮތްކަމުގެ ފުރިހަމަ ރަމުޒެއްކަންވެސް އޭނާ ފާހަގަކުރެއްވިއެވެ.
އެފްއޭއެމްގެ ރައީސްކަމުގެ މަގާމާއި ހަވާލުވެވަޑައިގަތުމަށްފަހު ތޯރިގު ވަނީ ސްވިޒަލޭންޑުން ފީފާގެ ރައީސްއާއި ބައްދަލުކުރައްވާފައެވެ. އެ ބައްދަލުކުރެއްވުމުގައި ރާއްޖޭގެ ފުޓްބޯޅަ ކޮޅަށް ނެގުމަށް ތޯރިގް ފަށާފައިވާ މަސައްކަތަށް ތައުރީފުކުރެއްވިއިރު، ރާއްޖެއިން މި އަހަރު ހޯދި ސައުތު އޭޝިއަން ސުޕަ ކްޕަގެ ކާމިޔާބީ އާއި ގުޅިގެން ތަހުނިޔާ ފޮނުއްވައި، ދިހަ އަހަރަށް ފަހު އެފްއޭއެމުން ފުރަތަމަ ފަހަރަށް އިލެވެން ސައިޑް އަންހެން ފުޓްބޯޅަ މުބާރާތެއް އަންނަ މަހު ބޭއްވުމަށް ނިންމުމާއި ގުޅިގެން ވެސް އިންފަންޓީނޯ ވަނީ ތައުރީފުކުރައްވާފައެވެ.
Advertisement
This content is created and paid for by advertisers and does not involve Voice Journalists
