ދިވެހިރާއްޖޭގެ ފުޓްބޯޅައިގެ މިސްރާބު މިހާރު ހުރީ ރަނގަޅަށްކަމަށް ދުނިޔޭގެ ފުޓްބޯޅަ އާ ބެހޭ މައި ޖަމިއްޔާ ފީފާގެ ރައީސް ޖިއާނީ އިންފަންޓީނޯ ވިދާޅުވެއްޖެއެވެ.

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސް އަޙްމަދު ޠާރިޤުގެ ދައުވަތަކަށް ފީފާގެ ރައީސް ޖިއާނީ އިންފަންޓީނޯ މިއަދު ހެނދުނު ވަނީ ރާއްޖެއަށް ޒިޔާރަތްކުރައްވާފައެވެ. މި ޒިޔާރަތުގައި އިންފަންޓީނޯ މިއަދު ވަނީ ރައީސް ޑރ.މުހައްމަދު މުއިއްޒުއާ ބައްދަލުކުރައްވާފައެވެ. މި ބައްދަލުކުރެއްވުމުގެ ތެރެއިން އިންފަންޓީނޯ ވަނީ ރާއްޖޭގެ ފުޓްބޯޅައިގެ ބަދަލުވަމުންދާ ހާލަތާ ގުޅޭގޮތުން ފީފާގެ ރައީސްގެ ރަޢުޔު ވިދާޅުވެދެއްވާފައެވެ.

އިންފަންޓީނޯ ވިދާޅުވީ ރާއްޖޭގެ ފުޓްބޯޅައަށް ގޮންޖެހުންތަކެއް ހުރިނަމަވެސް އަންނަމުންދާ ކުރިއެރުންތަކާމެދު ހިތްހަމަ ޖެހޭކަމަށެވެ. އެގޮތުން އެފްއޭއެމްގެ މިހާރުގެ ލީޑަރޝިޕަށް އިތުބާރުކުރައްވާކަން ފާހަގަކުރައްވަމުން އިންފަންޓީނޯ ވަނީ ފީފާގެ ފަރާތުން ރާއްޖޭގެ ފުޓްބޯޅަ ކުރިއެރުމަށް ކޮށްދޭންޖެހޭ ކަންކަން ކޮށްދެއްވާނޭކަމުގެ ޔަގީންކަން ދެއްވާފައެވެ. އަދި ފުޓްބޯޅައަށް ޒުވާން ހުނަރުވެރި ކުޅުންތެރިން ތަމްރީން ކުރުމުގެ މުހިންމުކަން ފާހަގަކުރައްވާފައެވެ.

ފީފާގެ ރައީސް ޖިއާނީ އިންފަންޓީނޯ މިއަދު ބޭއްވި ފުޓްބޯޅަ ފެސްޓްގައި...

ރާއްޖެއަށް ކުރެއްވި ޒިޔާރަތުގެ ތެރެއިން އިންފަންޓީނޯ ވަނީ ގަލޮޅު ދަނޑުގައި ބޭއްވި ފުޓްބޯޅަ ފެސްޓް ހަރަކާތުގައި ބައިވެރިވެ ވަޑައިގެންފައެވެ. މި ހަރަކާތުގައި ދައްކާލުމުގެ ހާއްސަ މެޗެއް ކުޅެފައިވާއިރު، އެއްކޮޅުން ބައްދަލުކުރީ ފީފާގެ ރައީސް ކެޕްޓަންކަމުގެ ދަށުން އެކުލަވާލި ޓީމަކާއި ރައީސް ޑރ.މުހައްމަދު މުއިއްޒުގެ ކެޕްޓަންކަމުގެ ދަށުން އެކުލަވާލި ޓީމެކެވެ.

ގަލޮޅު ދަނޑުގައި ކުރިއަށްގެންދިޔަ ހަރަކާތުގައި ގިނަ އަދަދެއްގެ އާއްމުން ވަނީ ބައިވެރިވެފައެވެ. މިއީ ހީނަރުވެފައިވާ ރާއްޖޭގެ ފުޓްބޯޅައިގެ ފޯރި ގަދަކުރުމުގެ ގޮތުން ބޭއްވި އިވެންޓެއްކަމަށް އެފްއޭއެމުން ބުނެއެވެ.