ރާއްޖޭގެ ފުޓްބޯޅަ ކުރިއެރުވުމުގައި ފީފާއިން ދޭ އެހީތެރިކަމަށް ރައީސްގެ ޝުކުރު
ރާއްޖޭގެ ފުޓްބޯޅަ ކުރިއެރުވުމުގައި ފުޓްބޯޅަ މައި އިދާރާ،މފީފާއިން ދޭ އެހީތެރިކަމަށް ރައީސް ޑރ. މުޙައްމަދު މުޢިއްޒު ޝުކުރުއަދާކުރައްވައިފިއެވެ.
ރައީސް އެފަދައިން ވިދާޅުވީ ރާއްޖޭގެ ފުޓްބޯޅަ އިދާރާ، އެފްއޭއެމްގެ ދައުވަތަކަށް ފީފާގެ ރައީސް ޖިއާނީ އިންފަންޓީނޯ އިއްޔެ ރާއްޖެއަށް ކުރެއްވި ދަތުރުފުޅުގެ ތެރެއިން އެމަނިކުފާނާއި އެކު ބޭއްވެވި ބައްދަލުވުމުގެ ތެރެއިންނެވެ.
އެގޮތުން މިއަދު"އެކްސް"ގައި ކުރެއްވި ޕޯސްޓެއްގައި ރައީސް ވިދާޅުވީ، ފީފާގެ ރައީސްއާއި ބައްދަލުކުރެއްވުމަކީ ލިބޭ އުފަލެއް ކަމަށާއި، އެ ބައްދަލުވުމުގައި ރާއްޖޭގެ ފުޓްބޯޅަ ކުރިއެރުވުމުގައި ފީފާގާއި އެފްއޭއެމްގެ ގުޅުން އިތުރަށް ހަރުދަނާ ކުރެވޭނެ ކަންކަމާއި ގުޅޭ ގޮތުން މަޝްވަރާކުރައްވައިފައިވާ ކަމަށެވެ.
އަދި ރާއްޖޭގެ ފުޓްބޯޅަ ކުރިއެރުވުމުގައި ފީފާއިން ރާއްޖެއަށް ދޭ އެހީތެރިކަމަށް ޝުކުރު އަދާކުރައްވާ ކަމަށް ރައީސް ވަނީ ވިދާޅުވެފައެވެ.
އިއްޔެ ރާއްޖެއަށް އިންފަންޓީނޯ ކުރެއްވި ދަތުރުފުޅުގެ ތެރެއިން ރައީސް އާއެކު ބޭއްވެވި ބައްދަލުވުމުގެ އިތުރުން، ގަލޮޅު ދަނޑުގައި ބޭއްވި ފުޓްބޯޅަ ފެސްޓް ހަރަކާތުގައި ވެސް ބައިވެރިވެވަޑައިގެންނެވިއެެވެ. މި ހަރަކާތުގައި ދައްކާލުމުގެ ހާއްސަ މެޗެއް ކުޅެފައިވާއިރު، އެއްކޮޅުން ބައްދަލުކުރީ ފީފާގެ ރައީސް ކެޕްޓަންކަމުގެ ދަށުން އެކުލަވާލި ޓީމަކާއި ރައީސް ޑރ.މުހައްމަދު މުއިއްޒުގެ ކެޕްޓަންކަމުގެ ދަށުން އެކުލަވާލި ޓީމެކެވެ.
ގަލޮޅު ދަނޑުގައި ކުރިއަށްގެންދިޔަ ހަރަކާތުގައި ގިނަ އަދަދެއްގެ އާއްމުން ވަނީ ބައިވެރިވެފައެވެ. މިއީ ހީނަރުވެފައިވާ ރާއްޖޭގެ ފުޓްބޯޅައިގެ ފޯރި ގަދަކުރުމުގެ ގޮތުން ބޭއްވި އިވެންޓެއްކަމަށް އެފްއޭއެމުން ބުނެއެވެ.
Advertisement
This content is created and paid for by advertisers and does not involve Voice Journalists
