އިއްޔެ ނެގި އައްޑޫ ސިޓީ ކައުންސިލުން ވަކިވުމުގެ ފެންނަ ނުފެންނަ ވޯޓުގައި، ސިޓީ ކައުންސިލުން ވަކިވުމަށް އެ ސިޓީގެ ހުޅުދޫ އަދި މީދޫން ނިންމި ނިންމުމާއި ގުޅިގެން އެ ދެ ރަށުގައި މިރޭ ހަވާ އެރުވުމަށް ޚާއްސަ އިވެންޓެއް ބޭއްވުމަށް ނިންމައިފިއެވެ.

ހުޅުދޫ ދާއިރާގެ މެންބަރު މުޙައްމަދު ޝާހިދު (ޝާޑު) އަދި މީދޫ ދާއިރާގެ މެންބަރު އަބްދުއް ރަޙްމާންގެ އިސްނެންގެވުމުގެ މަތިން ބާއްވާ މި އިވެންޓު އޮންނާނީ މިރޭ 20:30ގައި ހުޅުމީދޫގެ ބަނދަރު ސަރަހައްދުގައެވެ.

މި އިވެންޓު ފާހަގަކުރަނީ ހުޅުދޫ، މީދޫ އަދި ފޭދޫގައި ވަކިވަކި ރަށު ކައުންސިލްތައް އުފެއްދުމާ މެދު އެ ތިން ރަށުގެ ރައްޔިތުންގެ ފެންނަ ނުފެންނަ ގޮތް ބެލުމުގެ ވޯޓުގައި، ވަކި ކައުންސިލެއް އުފައްދަން ފެންނަ ކަމަށް މައި ރަށް ހިތަދޫ އާއި ވަކިން އޮންނަ މީދޫ އަދި ހުޅުދޫގެ ރައްޔިތުން ނިންމި ނިންމުމާއި ގުޅިގެންނެވެ. 

އެގޮތުން އޮންނަ އިއްޔެގެ ވޯޓުގައި މީދޫގައި ވަކި ކައުންސިލެއް އޮތުމަށް ނިންމައިފައިވާއިރު، މީދޫގައި ވަކި ކައުންސިލެއް އޮތުމަށް ވޯޓު ދިނީ 841 މީހުންނެވެ. އެކަމާއި ދެކޮޅަށް ވޯޓު ދިނީ 144 މީހުންނެވެ. 

އަދި ހުޅުދޫގައި ވަކި ކައުންސިލެއް އޮތުމަށް ފެންނަ ކަމަށް 720 މީހަކު ވޯޓު ދިންއިރު، އެކަމާއި ދެކޮޅަށް 325 މީހަކު ވަނީ ވޯޓު ދީފައެވެ.

އެ ދެ ރަށާއި ޚިލާފަށް މައި ރަށް ހިތަދޫ އާއި ގުޅިފައިވާ ފޭދޫގެ ރައްޔިތުން ބޭނުންވަނީ ސިޓީ ކައުންސިލުގެ ބައެއްގެ ގޮތުގައި އެ ރަށް ބޭއްވުމަށެވެ. 

ފޭދޫގެ ނަތީއްޖާއިން ދައްކާ ގޮތުން އެ ރަށުގައި ވަކި ކައުންސިލެއް އޮތުމަށް ވޯޓު ދިނީ 612 މީހުންނެވެ. އަދި ސިޓީ ކައުންސިލުގެ ބައެއްގެ ގޮތުގައި ފޭދޫ އޮތުމަށް 1،822 މީހަކު ވަނީ ވޯޓު ދީފައެވެ.