ސިޔާސަތު ފަދަ ދާއިރާތަކުން ދަރިވަރުން ތަމުރީނުކުރަނީ ގައުމުގެ މުސްތަގުބަލު ބިނާކުރަން ކަމުގައި ރައީސް ޑރ. މުހައްމަދު މުއިއްޒުގެ އަނބިކަނބަލުން ސާޖިދާ މުޙައްމަދު ވިދާޅުވެއްޖެއެވެ.

 އެ ކަމަނާ މިހެން ވިދާޅުވީ، ކްލިކް ކޮލެޖްގެ ރިހިޔޫބީލް (ޖުބިލީ) ފާހަގަކުރުމަށް ރޭ މާގިރި ހޮޓަލުގައި ބޭއްވި ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ.

ތަފާތު ދާއިރާތަކުން ދަރިވަރުން ތަމުރީނުކުރުމުގެ މުހިންމުކަން ފާހަގަކުރައްވައި ފަސްޓް ލޭޑީ ވިދާޅުވީ، ތައުލީމީ ނިޒާމުގައި ސިއްހަތު، އާ ވިސްނުންތައް، އަދި މަސައްކަތްތެރިކަމާއި ހުނަރުވެރިކަމަށް އިސްކަންދޭއިރު، އޭގެ އަސްލު މަގުސަދަކީ ދަރިވަރުންގެ ފިކުރީ އަދި އަމަލީ ގާބިލިއްޔަތުކަން ކުރިއެރުވުން ކަމަށެވެ. އެގޮތުން، އުފެއްދުންތެރިކަން، ވިޔަފާރި، އަދި ސިޔާސަތު ފަދަ ދާއިރާތަކުން ދަރިވަރުން ތަމުރީނުކުރެވެނީ ގައުމުގެ މުސްތަގުބަލު ބިނާކުރުމަށް ކަމުގައި އެ ކަމަނާ ފާހަގަކުރެއްވިއެވެ.

އެ ކަމަނާގެ ވާހަކަފުޅުގައި އިތުރަށް ވިދާޅުވީ، އަހުލާގު ރަނގަޅު، ހަރުދަނާ އަދި ޒިންމާދާރު ޖީލެއް އުފެއްދުމަކީ، އުފާވެރި މުސްތަގުބަލެއް ހާސިލުކުރުމަށާއި ގައުމަށް އުފެއްދުންތެރިކަމާއި ކުރިއެރުން ގެނެސްދޭނެ ސަބަބެއް ކަމަށެވެ. 

މީގެ އިތުރުން، ދިވެހިރާއްޖޭގައި އަމިއްލަ ފަރާތްތަކުންނާއި ސަރުކާރުން ފޯރުކޮށްދޭ ތައުލީމުގައި ވެސް މިފަދަ މުހިންމު އަސާސްތައް ދެމެހެއްޓިފައިވާތީ އެކަމަށް އުފާކުރައްވާ ކަމަށް ވެސް ފަސްޓް ލޭޑީ ވިދާޅުވިއެވެ.

ކްލިކް ކޮލެޖުން ކުރިއަށްގެންދަވާ ތައުލީމީ ޕްރޮގްރާމުތަކުގެ މައްޗަށް އަލިއަޅުވާލައްވަމުން ސާޖިދާ ވިދާޅުވީ، ގައުމަށް ބޭނުންވާ ފަދަ ހުނަރުވެރި ދަރިވަރުން އުފެއްދުމުގެ ޤާބިލުކަން އެ ކޮލެޖްގެ ޕްރޮގްރާމުތަކުގައި އެބަހުރި ކަމަށެވެ. ގައުމު ބިނާކުރުމުގެ މަސައްކަތަކީ އެންމެންގެ މަސްއޫލިއްޔަތެއްކަން ފާހަގަކުރައްވައި އެކަމަނާ ވިދާޅުވީ، ދިވެހިރާއްޖޭގެ ތައުލީމީ ތާރީހުގައި އަމިއްލަ އެކި ފަރާތްތަކުގެ އިސްނެގުމާއި ޚިދުމަތް ވަރަށް މުހިއްމު ދައުރެއް އަދާކޮށްފައިވާ ކަމަށެވެ.

ފަސްޓް ލޭޑީގެ ވާހަކަފުޅު ނިންމަވާލެއްވީ، ދިވެހީންގެ ބަހާއި ސަގާފަތާއި އާދަކާދަތަކަށް ކަމޭހިތާ، ޒަމާނަށް ލޯހުޅުވިފައިވާ، އުފެއްދުންތެރި، ނަޒާހަތްތެރި ޖީލެއް ބިނާވެގެން އައުމަށް އުއްމީދު އައުކުރައްވަމުންނެވެ. ރޭގެ ރަސްމިއްޔާތުގައި ކްލިކް ކޮލެޖުގެ ފަރާތުން ދެއްވާ އެއްލައްކަ ރުފިޔާގެ ޚާއްސަ ސްކޮލާޝިޕް ލިބިވަޑައިގެންނެވި ފަރާތަށް އިނާމު ހަވާލުކޮށްދެއްވީ ސާޖިދާއެވެ. އަދި، ކޮލެޖަށް ދިގު މުއްދަތަށް ޚިދުމަތް ކޮށްފައިވާ މުވައްޒަފުންނަށް ވެސް ވަނީ ޚާއްސަ އިނާމުތައް ދެއްވާފައެވެ.