އިމިގްރޭޝަނުން ފޭސް އެކެއްގެ ގަރާޖުތައް ބަލާފާސްކޮށް ގިނަ އަދަދެއްގެ ބިދޭސީން ގެންގޮސްފި
ހުޅުމާލެ ފޭސް އެކެއްގެ ސިނާއީ ސަރަހައްދުގައި ހުރި ގަރާޖުތައް ބަލައި ފާސްކޮށް އެތަންތަނުން ގިނަ އަދަދެއްގެ ބިދޭސީން އިމިގްރޭޝަނުގެ ބެލުމުގެ ދަށަށް ގެންގޮސްފިއެވެ.
އިމިގްރޭޝަނުން ބުނީ މިއީ ސަރުކާރުގެ ކަމާބެހޭ ފަރާތްތަކާއި އިމިގްރޭޝަން ގުޅިގެން ގަވާއިދާ ހިލާފަށް އުޅެމުންދާ ބިދޭސީން ހޯދުމަށް ކުރިއަށްެގެންދާ ޤައުމީ އޮޕަރޭޝަނުގެ ތެރެއިން އެ އިދާރާގެ ބެލުމުގެ ދަށަށް ގެނެވުނު ބައެއްކަމަށެވެ. އެމީހުން ހައްޔަރުކޮށްފައިވަނީ ގަވާއިދާ ހިލާފަށް މަސައްކަތްކުރާކަމަށް ފާހަގަކުރެވިގެންނެވެ.
އިމިގްރޭޝަނުން ބުނީ ޓާސްކްފޯސްއިން އިއްޔެ ހަވީރު ވަނީ ހުޅުމާލެ ފޭސް 1 ގެ އިންޑަސްޓްރިއަލް ސަރަހައްދުގައި ހިންގާ ގަރާޖުތައް ބަލައި ފާސްކޮށް ޖުމްލަ 69 ބިދޭސީއަކު ޗެކްކޮށްފައިވާކަމަށެވެ. އޭގެތެރެއިން ގަވާއިދާ ހިލާފަށް އުޅެމުންދިއަ 14 މީހަކު އިމިގްރޭޝަންގެ ބެލުމުގެ ދަށަށް ގެނެސްފައިވާކަމަށް ބުންޏެވެ.
ގަވާއިދާ ހިލާފަށް އުޅެމުންދާ ބިދޭސީން ހޯދުމުގެ އޮޕަރޭޝަނުގައި މިދިޔަ ހަފްތާގައިވެސް ހުޅުމާލޭގައި ވަނީ އޮޕަރޭޝަނެއް ކުރިއަށްގެންގޮސްފައެވެ. އެ އޮޕަރޭޝަނުގައި ރުއްގަނޑު އަދި ބައުދަގަނޑުގެ ވިޔަފާރިކުރާ ތަންތަނަށްގޮސް ނުގަވައިދުން އުޅުނު ބިދޭސީންތަކެއް ވަނީ އަތުލައިގަނެފައެވެ. އެގޮތުން ބައު ދަގަނޑު ވިއްކާ ތަންތަނުން ވަނީ 14 މީހަކު ގެންގޮސްފައެވެ.
ނުގަވައިދުން އުޅޭ ބިދޭސީން ހޯދުމަށް ޤައުމީ ފެންވަރުގައި މިހާރު ކުރިއަށްދާ އޮޕަރޭޝަން ފަށާފައިވަނީ މިދިޔަ ސެޕްޓެމްބަރުމަހުގެ 21 ވަނަ ދުވަހުއެވެ. މި އޮޕަރޭޝަނާ ގުޅޭގޮތުން ރައީސް ޑރ.މުހައްމަދު މުއިއްޒު ވިދާޅުވެފައިވަނީ، ޤަވާއިދާ ހިލާފަށް އުޅޭ ބިދޭސީންގެ މައްސަލައަކީ މިހާރު ރާއްޖޭގައި އެންމެ ބޮޑު އެއް މައްސަލަ ކަމަށާއި، ނުގަވައިދުން އުޅެމުންދާ ބިދޭސީންގެ ސަބަބުން ދިވެހިންނަށް ލިބެންޖެހޭ ފުރުސަތުތައް ހަނިވެފައިވާކަމަށެވެ.
މި އޮޕަރޭޝަން ރާއްޖޭގައި މީހުން ދިރިއުޅޭ ހުރިހާ ރަށެއްގައި ކުރިއަށްގެންދާނޭކަމަށާއި، ހާއްސަ ގޮތެއްގައި ބޮޑެތި އާބާދީތައް ދިރިއުޅެމުންދާ ރަށްތައް ބަލާނޭކަމަށް ރައީސް ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
