ތިން މީހެއްގެ ޕީއެޗްޑީ ޤަބޫލުކުރަން ހައިކޯޓުން ކުރި ހުކުމް ސްޕްރީމްކޯޓުން ބާތިލުކޮށްފި
ތިން މީހެއްގެ ޕީއެޗްޑީ ސަނަދު ޤަބޫލުކުރުމަށް ހައިކޯޓުން މޯލްޑިވްސް ކޮލިފިކޭޝަންސް އޮތޯރިޓީގެ މައްޗަށް ކުރި އަމުރު ސްޕްރީމްކޯޓުން ބާތިލްކޮށްފިއެވެ.
އެމްކިއުއޭ އިން ގަބޫލު ނުކުރަން ނިންމާފައިވާ ޕީއެޗްޑީ ކޯހެއްގެ ސެޓްފިކެޓް ގަބޫލުކުރަން ހައި ކޯޓުން ހުކުމްކުރި މައްސަލަ އިސްތިއުނާފް ކުރުމަށް އެ އޮތޯރިޓީން ސްޕްރީމްކޯޓަށް ހުށަހަޅާފައިވަނީ މިދިޔަ އަހަރުގެ އޮކްޓޯބަރުމަހުގެ ތެރޭގައެވެ. އަހަރެއްހާ ދުަވަސްފަހުން ސްޕްރީމް ކޯޓުން ވަނީ މި މައްސަލައިގެ ހުކުމް މިއަދު އިއްވާފައެވެ.
ފިލިޕީންސްގެ ކޮލެޖަކުން ސަނަދު ލިބޭގޮތަށް ސްރީލަންކާގެ އެއިމްސް ކޮލެޖުން ބަޔަކު ޕީއެޗްޑީއަށް ކިޔަވަން ފެށީ، އެމްކިއުއޭއިން އެ ކޯސް ގަބޫލުކުރާކަން 2016 ވަނަ އަހަރު އެންގުމުންނެވެ. ނަމަވެސް އެމްކިއުއޭއިން ވަނީ 2018 ވަނަ އަހަރު އެ ކޯސް ގަބޫލުކުރުން ހުއްޓާލާފައެވެ. އެގޮތުން އެހާތަނަށް ކިޔަވަމުންދިޔަ މީހުންގެ ސެޓްފިކެޓް ގަބޫލުނުކުރާނޭކަމަށް އެމްކިއުއޭއިން އަންގާފައިވާއިރު، ފަހުން ކޯހުގެ ސެޓްފިކެޓް ވެލިޑޭޓްކުރަން ހުށަހެޅުމުން އެމްކިއުއޭއިން ވަނީ އެކަމާ ދެކޮޅު ހަދާފައެވެ.
އެންމެފަހުން އެމްކިއުއޭއިން އެ ސަނަދު ގަބޫލު ނުކުރުމުން ތިން މީހެއްގެ ފަރާތުން ހައި ކޯޓަށް ހުށަހެޅި މައްސަލާގައި އެކޯޓުން މިދިޔަ އަހަރުގެ ސެޕްޓެމްބަރުމަހު އެ އޮތޯރިޓީގެ މައްޗަށް ހުކުމް ކޮށްފައިވަނީ ސަނަދު ގަބޫލުކުރުމަށެވެ.
ދައުލަތުގެ ފަރާތުން ސްޕްރީމް ކޯޓަށް ހުށަހެޅި މި މައްސަލާގައި އެ ކޯޓުން މިއަދު ކުރި ހުކުމްގައި ވަނީ މި މައްސަލާގައި ރައްދުވާ ޝައްމޫން އާދަމަށް އެމްކިއުއޭއިން ސަނަދު ވެލިޑޭޓްކޮށް ނުދިނުމުން ގެއްލުމެއް ލިބިފައިވާނަމަ އެ ގެއްލުމުގެ ބަދަލު އޭނާއަށް ލިބިދޭންޖެހޭކަމަށް ކަނޑައަޅައި ލިބިފައިވާ ގެއްލުން ކަނޑައެޅުމަށް ހައިކޯޓަށް ތަހުވީލުކުރުމަށް ނިންމާފައެވެ.
Advertisement
This content is created and paid for by advertisers and does not involve Voice Journalists
