އަޑުއެހުން ތާވަލުކޮށްފައި ވަނިކޮށް ޔާމީން ދިއްދޫއަށް ދިޔުމުން ކޯޓުގެ އިންޒާރެއް
ފުއްގިރި މައްސަލައިގައި ކުރީގެ ރައީސް އަބްދުﷲ ޔާމީންގެ މައްޗަށް ދައުލަތުން އުފުލާ ދައުވާގެ އަޑު އެހުން މިއަދަށް ތާވަލުކޮށްފައިވަނިކޮށް، ހއ. ދިއްދޫއަށް ވަޑައިގެންނެވުމުން ކްރިމިނަލް ކޯޓުން އެމަނިކުފާނަށް އިންޒާރެއް ފޮނުވައިފިއެވެ.
ކްރިމިނަލް ކޯޓުން މިއަދު ޔާމީނަށް އިންޒާރެއް ފޮނުވައިފައިވަނީ، ޝަރީއަތުގެ އަޑުއެހުމެއް ތާވަލުކޮށްފައިވަނިކޮށް ކޯޓުގެ ހުއްދައަކާ ނުލައި ރަށުން ފުރައިގެން ދިޔުމަކީ ގާނޫނީ ފިޔަވަޅު އެޅިދާނެ ފަދަ ކަމެއް ކަމުގައި ބުނެއެވެ. ކޯޓުން ވަނީ މިއަދުގެ ޔާމީނުގެ ޝަރީއަތް ވެސް ކެންސަލްކޮށްފައެވެ.
"ދައުވާ ލިބޭ ފަރާތުން މަގުބޫލު ސަބަބެއް ނެތި ކޯޓަށް ހާޒިރުނުވުމަކީ އަދި މައްސަލަ ތާވަލު ކުރެވިފައި ވަނިކޮށް ކޯޓުގެ ހުއްދަނެތި ކޯޓު ހުރި ރަށުން ފުރައިގެން ދިއުމަކީ، އެ ފަރާތަކާމެދު ގާނޫނީ ފިޔަވަޅު އެޅިދާނެ އަމަލުތަކެއް،" ކޯޓުގެ މެސެޖުގައި ބުންޏެވެ.
އެހެން ނަމަވެސް އެނގިފައިވާ ގޮތުގައި ޔާމީނު ވަނީ ދިއްދޫއަަށް ވަޑައިގަންނަވާތީވެ، އެ އަޑުއެހުން އޮންލައިންކޮށް ކުރިއަށް ގެންގޮސްދިނުމަށް އެދި އެ ކޯޓަށް ސިޓީ ވެސް ފޮނުވާފައެވެ. އެހެން ނަމަވެސް އެ ހުއްދަ ކޯޓުން ދިންކަން ކަށަވަރުކޮށްފައެއް ނުވެއެވެ.
ޔާމީން ދިއްދޫއަށް ވަޑައިގެންނެވީ ހއ. އަތޮޅުން ބާއްވާ "ތިލައުތުރު އެވޯޑް 2025 ޙަފުލާ ޝަރަފުވެރިކޮށްދެއްވުމަށެވެ. އެ އެވޯޑު ޙަފުލާ އޮތީ މިރެއެވެ.
Advertisement
This content is created and paid for by advertisers and does not involve Voice Journalists
