ކޮވިޑް-19ގެ ދުވަސްވަރު ކޮވިޑުގެ ނަމުގައި ދައުލަތަށް 8.7 ބިލިއަން ރުފިޔާ ލިބުނުއިރު، އޭގެ ތެރެއިން ޚަރަދުކުރީ 4.2 ބިލިއަން ރުފިޔާއަށްވާއިރު، ލިބުނު ފައިސާ ޚަރަދުކުރީ ކޮން ކަމަކުތޯ އިގްތިސާދީ ތަރައްގީއާއި ބެހޭ ވަޒީރު މުޙައްމަދު ސަޢީދު ސުވާލު އުފައްދަވައިފިއެވެ.

ވަޒީރު އެފަދައިން ވިދާޅުވީ، މިއަދުގެ ރައްޔިތުންގެ މަޖިލީހުގައި ހުޅުމާލެ ދެކުނު ދާއިރާގެ މެންބަރު ޑރ. އަޙްމަދު ޝަމްހީދު ކުރެއްވި ސުވާލުތަކަށް ޖަވާބުދެއްވަމުންނެވެ. މެންބަރު ޝަމްހީދު ވަނީ މި ސަރުކާރުން ފައިސާ ޗާޕުކުރަން އުޅޭކަމަށް ބުނެ ވަޒީރާ ސުވާލުކުރައްވާފައެވެ.

އެ ސުވާލަށް ޖަވާބު ދެއްވަމުން ވަޒީރު ވިދާޅުވީ، މި ސަރުކާރުން ފައިސާ ޗާޕެއް ނުކުރާނެ ކަމަށެވެ. އެއާއެކު ނިމިދިޔަ އެމްޑީޕީގެ ވެރިކަމުގެ ވާހަކަތައް ހިއްސާކުރައްވަމުން ވަޒީރު ވިދާޅުވީ، އެމްޑީޕީގެ ވެރިކަން ނިމުނުއިރު ވާރުތަވި ދަރަންޏާއި ހިންގުމުގެ ޚަރަދު ކަމަށާއި، އާމްދަނީއެއް ލިބޭނެ އެއްވެސް ގޮތެއް ނެތް ކަމަށެވެ. 

އެއާއެކު ވަޒީރު ވަނީ އޭރު ކޮވިޑުގެ ނަން ބޭނުންކޮށްގެން ޚަރަދަށް ޒިންމާ ވުމުގެ ޤާނޫނު ތަޅުއެޅުވުމަށްފަހު ފައިސާ ޗާޕުކުރިކަން ފާހަގަކުރައްވާފައެވެ. އަދި ކޮވިޑުގެ ނަމުގައި އޭރު ދައުލަތަށް 8.7 ބިލިއަން ރުފިޔާ ލިބުނުއިރު، އޭގެން ޚަރަދުކޮށްފައިވަނީ 4.2 ބިލިއަން ރުފިޔާއަށްވާއިރު، އެ ފައިސާ ޗާޕުކުރީ ކޮން ބޭނުމެއްގައިތޯ ވަޒީރު ވަނީ ސުވާލުއުފައްދަވާފައެވެ.

އެގޮތުން ދިވެހި ރުފިޔާ ނިކަމެތިވީ އެ ދުވަހު އެ ފައިސާ ޗާޕުކުރުމުން ކަމަށް ވަޒީރު ވިދާޅުވެފައިވެއެވެ.

ވަޒީރު އެފަދައިން ވިދާޅުވިއިރު، ޕެންޝަން އޮފީސް މެދުވެރިކޮށް އެމްއެމްއޭއިން ސެކަަންޑްރީ މާކެޓުގައި 2.5 ބިލިއަން ރުފިޔާގެ ބޮންޑެއް ވިއްކާކަމަށް ބުނެ ވާހަކަތަކެއް ދަނީ ފެތުރެމުންނެވެ. އެކަމާއި ގުޅިގެން ފިނޭންސް މިނިސްޓްރީ، އެމްއެމްއޭ އަދި ޕެންޝަން އޮފީހުން ވެސް ރަސްމީ އެއްޗެއް ބުނެފައެއް ނުވެއެވެ.

އެހެން ނަމަވެސް އެކަމަކީ ފައިސާ ޗާޕުކުރުން ކަމުގައި ފާހަގަކޮށް، އިދިކޮޅު އެމްޑީޕީގެ ލީޑާޝިޕްގެ ބޭފުޅުންނާއި މަޖިލިސް މެންބަރުން އަންނަނީ ކަންބޮޑުވުން ފާޅުކުރަމުންނެވެ. 

އަދި އެކަމުގެ ތެރެއިން އެ މުއާމަލާތަކީ އިގްތިސާދީ ގޮތުންނާއި މާލީ ގޮތުން ވެސް ގެއްލުން ބޮޑު މުއާމާލާތެއް ކަމަށް ޤަބޫލުކުރައްވާ ކަމަށް ވިދާޅުވެ، ޕެންޝަން ބޯޑުގެ މެންބަރުކަމުން މީރާގެ ކުރީގެ ޗެއާމަން ސަރުވަޝް އާދަމް ވަނީ އިސްތިއުފާ ވެސް ދެއްވާފައެވެ.