ދިވެހި ފިލްމް އިންޑަސްޓްރީއަށް ބަލާއިރު ފިލްމްު ބަލާ މީހުން މާޔޫސްވިޔަ ނުދޭނޭ އެއްބަޔަކީ ހަމަ ގައިމުވެސް ޑާކްރެއިން އެންޓަރޓައިންމަންޓެވެ. ކޮވިޑާ ގުޅިގެން ދިވެހި ފިލްމީ އިންޑަރސްޓްރީ ހުއްޓުމަކަށް އައި ވަގުތުވެސް ޑާކްރެއިނުން ވަނީ ސަޅި އުފެއްދުންތަކެއް ނެރެފައެވެ.
ޑާކްރެއިނުން މިފަހުން ދިވެހި ސިނަމާއަށް ގެނެސްދިން ފިލްމަކީ "އަލިފާން" އެވެ. މާސްޓާ ޕީސްއެއްގެ ގޮތުގައި ފާހަގަކުރެވުނު މި ފިލްމަށްފަހު މީޑިއާނެޓުން ދައްކަމުންދިޔަ ޑްރާމާ ސިލްސިލާ "މޫސުން" ގެ ވެސް ފަހު އެޕިސޯޑު ވަނީ ދައްކާ ނިމިފައެވެ. އަހަރު ނިމެން ދެމަސް އޮތްނަމަވެސް ޑާކްރެއިނުން އަދި މިވަރަކުން ނިންމައެއް ނުލިއެވެ. އަހަރު ނިންމާލާ ފިލްމެއްގެ ގޮތުގައި ޑާކްރެއިނުން އޮލިމްޕަހަށް ނެރުމަށް ނިންމި ފިލްމް "އަލްވަދާޢު" ގެ ޕޯސްޓަރު ދައްކާލިއިރު، ގިނަ ބަޔަކު ސޯޝަލް މީޑިއާގައި ވަނީ އެ ޕޯސްޓަރު ހިތްގައިމުކަމުން އެވާހަކަ ދައްކާފައެވެ.
އޮލިމްޕަހުގައި އަލްވަދާއު ދެއްކުމަށް ޑާކްރެއިނުން ނިންމާފައިވަނީ ޑިސެމްބަރުމަހުގެ އެއްވަނަ ދުވަހުއެވެ. ޑާކް ރެއިނުން ވަނީ އަލްވަދާއުގެ ޕްރިމިއާ ނައިޓަށް 10 މީހަކަށް ފުރުސަތު ދީފައެވެ. އެ ފުރުސަތު ދީފައިވަނީ އަލިފާނަށް ލިބުނު ކާމިޔާބީ ފާހަގަކުރުމުގެ ގޮތުން ބެލުންތެރިންނަށް ޑާކްރެއިނުން ދިން ހަދިޔާއެއްގެ ގޮތުގައެވެ.
"އަލްވަދާއު" މި ފިލްމުގެ ސްކްރީން ޕްލޭ ގެނެސްދީފައިވަނީ ޝަހުދާ މަހްމޫދެވެ. އަލީ ޝިފާއު (ޗިއްޕެ) ޑައިރެކްޓްކުރާ މި ފިލްމްގެ މެއިން ކާސްޓުންގެ ގޮތުގައި ފެނިގެންދާނީ މަރިޔަމް މަޖުދާ (މަޖޫ) އާއި ޝަރަފުއްދީން (ޝަރަފް) އެވެ. އަދި ހަމަ އެހެންމެ މި ފިލްމުން ތަޖުރިބާކާރު އެކްޓަރު މުޙައްމަދު ރަޝީދު (ދަރާ ރަޝީދު) އާއި، އަލިފާނުން މުޅިން ތަފާތު ގޮތަކަށް ފެނިގެންދިޔަ ޝީލާ ނަޖީބް ވެސް ފެނިގެންދާނޭކަމަށް ޑާކްރެއިނުން ބުނެއެވެ.
Advertisement
This content is created and paid for by advertisers and does not involve Voice Journalists
