އެމެރިކާއާއި އިންޑިއާ ގުޅިގެން ފޯޅަވަހި ކައިރީގައި އަސްކަރީ ތަމްރީނުތަކެއް ހަދައިފިއެވެ.
އިންޑިއާގެ ނޫސްތައް ބުނާ ގޮތުން މި ތަމްރީނުތަކުގައި މައިގަނޑު ގޮތެއްގައި ކުރިއަށްދިޔައީ ދުޝްމަނުންގެ ސަބްމެރިންތަކާ ދެކޮޅަށް ހަމަލާދިނުމާއި ގުޅޭ ފަރިތަކުރުންތަކެކެވެ. އިންޑިއާ އާއި އެމެރިކާގެ ކަނޑުގެ ސިފައިން ގުޅިގެން ކުރިއަށްގެންދިޔަ މި ތަމްރީނުތަކުގައި އެމެރިކާ ނޭވީގެ ޕީ-8އޭ ޕޮސައިޑަން މަރުކާގެ މަތިންދާބޯޓާއި އިންޑިއާ ނޭވީގެ ޕީ-8އައި މަތިންދާބޯޓު ބޭނުންކުރިކަމަށްވެއެވެ.
ވައިގެ މަގުންނާއި ކަނޑުމަގުން ސަބްމެރިންނަށް ހަމަލާދޭނެ ގޮތުގެ ތަމްރީނުތަކެއް މި ދެގައުމު ގުޅިގެން ހެދިއިރު، ދާދިފަހުން ދެގައުމު ގުޅިގެން ވަނީ އިލެކްޓްރޯނިކް ވޯފެއަރ އަދި ޓެކްނޮލޮޖީގެ ވަސީލަތްތައް ބޭނުންކޮށްގެން ހަމަލާދިނުމާއި ގުޅޭ ތަމްރީނުތަކެއްވެސް ހަދާފައެވެ.
އިންޑިއާ ކަނޑާއި ޕެސިފިކް ކަނޑުގައި ޗައިނާގެ ނުފޫޒު ގަދަކުރުމަށް އެގައުމުން މަސައްކަތްކުރަމުންދާއިރު، އެކަން ވިޔަ ނުދިނުމަށް އިންޑިއާއާއި އެމެރިކާ އަދި އެދެގައުމާއި ބައިވެރިވާ އެހެން ގައުމުތަކުން ދަނީ ގުޅިގެން ގިނަ މަސައްކަތްތަކެއް ކުރަމުންނެވެ. މިމަސައްކަތްތަކުގެ ތެރޭގައި މިފަދަ ތަމްރީނުތައް ހެދުމަކީ ފަހަކަށް އައިސް އާއްމު ކަމަކަށް ވަނީ ވެފައެވެ.
ފޯޅަވަހި ކައިރީ އެމެރިކާ އާއި އިންޑިއާ ގުޅިގެން އަސްކަރީ ތަމްރީނުތަކެއް ކުރިއަށްގެންދިޔައިރު، ޑިއޭގޯ ގާސިއާގައި އެމެރިކާގެ އަސްކަރިއްޔާގެ ބޭހެއް ގާއިމްކޮށްފައިވާކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
