ކުދިންނަށް އުފާވެރި ކުރިމަގެއް ހޯދައިދިނުމަށްޓަކައި އަނިޔާއިން އެކުދިން ރައްކާތެރިކުރުމަކީ ކޮންމެހެން މުހިންމު ކަމެކެވެ. ކުދިން އަނިޔާއިން ރައްކާތެރިކުރެވޭނީ އެކަން ކުރާނެ ގޮތް ކުދިންގެ މައިންބަފައިން ނުވަތަ ބެލެނިވެރިންނަށް އެނގިގެންނެވެ. ކުދިންނަށް ކުރިމަތިވެދާނެ އަނިޔާގެ ބާވަތްތަކާއި، އަނިޔާ ކުރިމަތިވެދާނެ ގޮތްތަކާއި، ކުއްޖަކަށް އަނިޔާއެއް ލިބިފައިވާނަމަ އެކަން ދެނެގަންނާނެ ގޮތާއި، ކުއްޖަކަށް އަނިޔާއެއް ލިބުމުން ދެން ކަންކުރަންވީ ގޮތްވެސް އެނގިގެންނެވެ.
ކުދިން އެންމެ ގިނަ ވަގުތު ހޭދަކުރާ ތަނަކީ އެކުދިން ދިރިއުޅޭ ގެ ކަމަށް ވުމާއެކު އެންމެ ފުރަތަމަ ސަމާލުވާންޖެހޭނީ ގޭތެރެއަކީ ކުދިންނަށް ރައްކާތެރި ތަނަކަށް ހެދުމަށެވެ. މިކަން ހާސިލްކުރުމަށްޓަކައި ކުދިންގެ މައިންބަފައިން ނުވަތަ ބެލެނިވެރިންނަކީ އަނިޔާއާ ދުރު ބަޔަކަށް ވާންޖެހެއެވެ. މަޑުމައިތިރިކަމާއި، އޯގާތެރިކަމާއެކު ކުދިންނާ މުއާމަލާތުކުރާ ބަޔަކަށް ވާންޖެހެއެވެ. ކުދިންގެ ފަރާތުން ފެންނަން ނޭދޭ ކަންކަން އެކުދިންގެ ފަރާތުން ފެންނަ ދަނޑިވަޅުތަކުގައިވެސް ރުޅިވެރިކަން އެއްފަރާތްކޮށް ކެތްތެރިކަމާއެކު އެކަންކަމަށް އިޖާބަދޭން އެނގޭ ބަޔަކަށް ވާންޖެހެއެވެ.
މައިންބަފައިންނާ ކުދިންނާ ރަނގަޅު ގުޅުމެއް އޮތުމަކީ ގޭތެރެއިން ކުދިންނަށް ކުރިމަތިވެދާނެ އަނިޔާއިން އެކުދިންނަށް ރައްކާތެރިކަން ލިބުމަށް މަގުފަހިވާ ކަމަކަށް ވާފަދައިން އެއީ ގެއިން ބޭރުން ކުދިންނަށް ލިބިދާނެ އަނިޔާއަކުން ރައްކާތެރިވުމަށްވެސް ލިބޭ ބާރަކަށްވެއެވެ. ކުދިންނާ މައިންބަފައިންނާ ދެމެދު އޮންނަ ގުޅުން ރަނގަޅު ނަމަ އަނިޔާއިން ރައްކާތެރިވާނެ ގޮތްތައް މައިންބަފައިންގެ ފަރާތުން ކުދިންނަށް އެނގެން މަގުފަހިވެއެވެ. އަދި މީގެ އިތުރުން ކުއްޖަކަށް އަނިޔާގެ ހާލަތެއް ކުރިމަތިވާ ހިނދު އެކަން ކުދިންގެ ފަރާތުން އެކުދިންގެ މައިންބަފައިންނަށް އެނގުމުގެ ފުރުސަތުވެސް ބޮޑުވާނެއެވެ.
ކުޑަކުދިންނަށް އެންމެ ގިނައިން ކުރިމަތިވާ އެއް ބާވަތުގެ އަނިޔާގެ ގޮތުގައި ތަފާސް ހިސާބުތަކުން ދައްކާ ޖިންސީ އަނިޔާއާ ގުޅުވައިގެން މިސާލެއް ނަގާނަމެވެ. ޖިންސީ އަނިޔާގެ ޝިކާރައަކަށް ވަރަށް ތުއްތު ކުދިންވެސް ވެއެވެ. ކޮންމެ ފަހަރަކު ޖިންސީ އަނިޔާގެ ޝިކާރައަކަށް ކުދިން ވަނީ ގެއިން ބޭރުގައި ވަނިކޮށެއް ވެސް ނޫނެވެ. ގޭތެރޭގައި އުޅޭ އަދި ކުއްޖާއާ ގާތް ގުޅުމެއް އޮންނަ މީހުންގެ ފަރާތުން ކުދިންނަށް ކިތަންމެ ފަހަރަކު ޖިންސީ އަނިޔާއާ ކުރިމަތިވެފައި އެބަހުއްޓެވެ. އިންޓަނެޓް މެދުވެރިކޮށް މާ ދުރުގަ ހުންނަ މީހަކު ކުއްޖާ ޖިންސީ ޝިކާރައަކަށް އެބަ ހަދައެވެ. މިއީ ހައްތަހާވެސް ކުދިންގެ މައިންބަފައިންނަށް އެނގުން މުހިންމު ކަންކަމެވެ.
މިފާހަގަކުރި ކަންކަމާ މެދު މައިންބަފައިން ހޭލުންތެރިވުމުގެ އިތުރުން މިފަދަ އަނިޔާއަކުން ކުދިން އަމިއްލައަށް ރައްކާތެރިވުމަށްޓަކައި ކުރެވޭނެ ކަންކަން ކުދިންނަށް ބުނެދޭން ޖެހެއެވެ. ކުދިންގެ އުމުރާ ގުޅޭގޮތުން އެކުދިންނަށް ފަސޭހައިން ނަގައިގަނެވޭނެ ބަސްތައް ބޭނުންކޮށްގެންނެވެ. ކުދިންނަށް އެފަދަ އަނިޔާއެއް ކުރިމަތިވުމުން ލަސްނުކޮށް މައިންބަފައިގާތު ބުނަން ހިތްވަރު ދޭންވެސް ވާނެއެވެ. އަދި އެފަދަ ކަމެއްގެ ވާހަކަ ކުއްޖަކު ބުނެފިނަމަ މައިންބަފައިން އެކަމަށް އިޖާބަދީ ކުދިންގެ ރައްކާތެރިކަން ކަށަވަރު ކުރުމަށް ލަސްނުކޮށް ފިޔަވަޅު އަޅަންވާނެއެވެ.
އިންޓަނެޓްގެ ޒަރިއްޔާއިން ކުދިންނަށް ކުރިމަތިވެދާނެ ނުރައްކާތަކަކީ މައިންބަފައިން މިއަދު އެންމެ ބޮޑަށް ސަމާލުވާންވީ އެއް ދާއިރާއެވެ. ކުދިން ގޭގައި ތިބުމުން އެކުދިންގެ ރައްކާތެރިކަން ކަށަވަރުވީ ކަމަށް ކުރިން ބެލެވުނަސް މިހާރު ކަން އޮތީ އެހެންނެއް ނޫންކަން މައިންބަފައިން މިއަދު ގަބޫލުކުރަން ޖެހެއެވެ. އިންޓަނެޓާ ގުޅިފައި ހުންނަ ފޯނު ނުވަތަ ޓެބްލެޓް ބޭނުންކުރަން ކޮޓަރީގައި އިންނަ ކުއްޖާ އެއިންނަނީ މުޅި ދުނިޔެއާ ގުޅިފައިކަން މައިންބަފައިން މިއަދު ދަންނަންޖެހެއެވެ. އެކުދިން ވާހަކަ ދައްކަނީ ކޮން ބަޔަކާތޯ ބަލަންޖެހެއެވެ. އެކުދިން އިންޓަނެޓް މެދުވެރިކޮށް ބަލަނީ ކޮން އެއްޗެއްތޯ ޔަގީންކުރަންޖެހެއެވެ. މިކަން ކުރެވޭނެ ގޮތްތައް އެބަހުއްޓެވެ. ކޮންމެފަހަރަކު ކުއްޖާ ގެންގުޅޭ ޑިވައިސް އަތުނުލާވެސް ކުއްޖާ އެއިން ކުރާ މުއާމަލާތުތައް ދެނެގަންނަން ބޭނުންކުރެވޭނެ ކިތަންމެ ވަސީލަތެއްވެސް އެބަހުއްޓެވެ. ކުރަންވީ ކަމަކީ މިކަންކަން ދެނެގަނެ އެކަންކަމާ މެދު ހޭލުންތެރިވުމެވެ.
Advertisement
This content is created and paid for by advertisers and does not involve Voice Journalists
