ފުވައްމުލައް ސިޓީއަށް މިވަގުތަށް އެންމެ މުހިއްމު އެއްކަމަކީ ބަނދަރު މައްސަލައަށް ހައްލެއް ގެނައުންކަމަށް އެ ސިޓީގެ މޭޔަރު އިސްމާޢީލް ރަފީޤް ވިދާޅުވެއްޖެއެވެ.
ރައީސުލްޖުމްހޫރިއްޔާ ފުވައްމުލައް ސިޓީއަށް ކުރެއްވި ދަތުރުފުޅުގެ ތެރެއިން ވޮއިސްއަށް ދެއްވި ބަސްދީގަތުމެއްގައި މޭޔަރު ރަފީގް ވިދާޅުވީ، އިގްތިސާދީ އަދި އުމްރާނީ ގޮތުން ފުވައްމުލައް ސިޓީ ކުރިއަރައިގެން އަންނައިރު އޮތް އެންމެބޮޑު ދައްޗަކީ އެކަށީގެންވާ ބަނދަރެއް ނެތުމުގެ މައްސަލަކަމަށެވެ.
މޭޔަރު ވިދާޅުވީ ބަނދަރަކީ ފުވައްމުލަކު ތަރައްޤީއާ ގުޅިފައިވާ އެންމެ މުހިންމު ތަން ކަމަށާއި، މަސްވެރިކަމާ، ޓޫރިޒަމާއި އެނޫން ކަންކަމަށް ބެލިނަމަވެސް ބަނދަރުގެ މުހިންމުކަން ބޮޑުކަމަށް މޭޔަރު ފާހަގަކުރެއްވިއެވެ.
ފުވައްމުލައް ސިޓީގެ ތަރައްޤީއާ ގުޅުންހުރި ކަންކަން ކުރުމުގައި އެސިޓީން އަބަދުވެސް މަރުހަބާ ކިޔާނަން
މޭޔަރު އިސްމާޢީލް ރަފީޤް
ބަނދަރުގެ އިތުރުން ހައުސިން އާއި ހޮސްޕިޓަލް ހިދުމަތާއި ފެނާ ނަރުދަމާގެ ހިދުމަތް ރަނގަޅު ފެންވަރެއްގައި އޮތުމަކީ ފުވައްމުލަކަށް މިހާރުވެސް ބޭނުންވެފައިވާ ހިދުމަތްތައް ކަމަށެވެ.
ރައީސް ޑރ.މުއިއްޒު އިއްޔެ ފުވައްމުލަކަށް ކުރެއްވި ދަތުރުފުޅުގެ ތެރެއިން ވަނީ އެ ސިޓީގެ ރައްޔިތުން ބޭނުންވާ މުހިންމު ކަންކަން ނިންމަވައިދެއްވާނޭކަމުގެ ޔަގީންކަން ދެއްވާފައެވެ. އެގޮތުން މި ދައުރުގައި ހައުސިން މަޝްރޫޢު ނިންމަވައިދެއްވާނޭކަމުގެ ޔަގީންކަން ދެއްވިއިރު، ރޭ ވަނީ ފުވައްމުލަކު ސިޓީގައި 500 ހައުސިންގް ޔުނިޓް ތަރައްގީ ކޮށްދެއްވުމަށް އެމަނިކުފާނު ވެވަޑައިގެންނެވި ވައުދުފުޅުގެ ތެރެއިން، 75 ޔުނިޓް ތަރައްގީ ކުރުމުގެ މަޝްރޫއުގެ އެއްބަސްވުމުގައި ސޮއިކޮށްފައެވެ.
މީގެ އިތުރުން މިހާރު އޮތް ބަނދަރާ ގުޅުވައިގެން އިތުރު ބަނދަރެއް ތަރައްޤީކޮށްދެއްވާނޭކަމަށްވެސް ވަނީ ވިދާޅުވެފައެވެ. އައު ބަނދަރު ނިމުމުން ބަނދަރުގެ މައްސަލައަށް ހައްލެއް އަންނާނޭކަމަށް ރައީސް ވަނީ ފާހަގަކުރައްވާފައެވެ.
Advertisement
This content is created and paid for by advertisers and does not involve Voice Journalists
