ކޮންޓްރެކްޓާ ފައިނޭންސިން އުސޫލުން ހިންގުމަށް ޕްރައިވެޓް 53 ކުންފުންޏަކާއި އެކު ސަރުކާރުން ހެދި އެއްބަސްވުންތަކާއި ގުޅިގެން އެ މަޝްރޫއުތަކަށް ފައިސާ ދިނުން ހުއްޓުވުމަށް އެމްޑީޕީ އިން ކޯޓަށް ދާން ނިންމައިފިއެވެ.
އެމްޑީޕީން އެފަދައިން ނިންމީ ރޭ ބޭއްވި އެމްޑީޕީގެ ޤައުމީ މަޖިލީހުގެ ބައްދަލުވުމުގައި ހޯރަފުށީ ދާއިރާގެ މެންބަރު ހުށަހެޅުއްވި ޤަރާރު ފާސްކޮށްގެންނެވެ.
އެގޮތުން ސަލީމު ހުށަހެޅުއްވި ޤަރާރުގައި ވިދާޅުވީ، ބިޑަކާއި ނުލާ ވާދަވެރި ފަރާތްތަކަށް ފުރުސަތު ނުލިބޭ ގޮތަށް ސަރުކާރުގެ މަޝްރޫޢުތައް ބަހާލުމަކީ ވަރަށް ބޮޑު ކަންބޮޑުވުމެއް ކަމަށާއި، ކެބިނެޓުން ބޭނުންވާ ބަޔަކަށް ބޭނުން އަގެއްގައި މަޝްރޫޢުތައް ބަހާލީ މާލިއްޔަތު ޤަވައިދަށް އިސްލާހު ގެނައުމަށް ފަހުގައި ކަމަށެވެ.
އަދި ސަރުކާރުން ހަވާލު ކުރި މަޝްރޫޢުތައް އިއުލާންކޮށްފައި ނުވުމާއި ސަރުކާރާއި ގުޅުން ހުރި ފަރާތްތަކަށް ނިސްބަތްވާ ކުންފުނިތަކަށް ނޫން ބަޔަކަށް ބީލަމުގައި ބައިވެރި ނުވެވުމާއި, ކޮންޓްރެކްޓަރުންގެ ދަފްތަރުގައި ނެތް ކުންފުނިތަކަށް މަޝްރޫޢުތައް ހަވާލުކޮށްފައި ވާތީ އެކަމާއި ގުޅިގެން ކަންބޮޑުވާކަމަށް ވެސް ސަލީމް ވިދާޅުވިއެވެ.
މަޖިލީހުގެ ކުރީގެ ނައިބު ރައީސް ސަލީމް ރޭގެ ޖަލްސާގައި -- ފޮޓޯ: ސަން
އުވާލުމުގެ މަރުހަލާގައިވާ ކުންފުނިތަކަށް މަސައްކަތް ހަވާލުކޮށްފައިވާއިރު އެ ކުންފުނިތަކުގެ ފަންނީ، މާލީ އަދި މަސައްކަތުގެ ތަޖުރިބާ އަށް ބަލާފައި ނުވާ ކަމަށް ވެސް އެ ގަރާރުގައި ބުނެފައިވެއެވެ.
އަދި އެއް ބާވަތެއްގެ ޕްރޮޖެކްޓްތައް އެކި އަގުގައި ދީފައިވާކަމަށާއި، އެހެންކަމަށް ވާއިރު މާލިއްޔަތު ޤަވައިދާ ޚިލާފަށް ޤަވައިދެއް ހަދައިގެން ވަކި ބަޔަކަށް ބޮޑެތި އަގުގައި މަޝްރޫޢުތައް ދިނުމަކީ ޤާނޫނުއަސާސީ އާއި ޚިލާފު ކަމެއް ކަމަށްވެސް އެ ގަރާރުގައި ސަލީމް ހުށަހަޅުއްވައިފައިވެއެވެ.
އެ ނުކުތާތަކާއި ގުޅިގެން 6 ފިޔަވަޅެއް އެޅުމަށް ގަރާރުގައި ސަލީމް ވަނީ ހިމަނުއްވާފައެވެ. އެއީ:
1. ރައީސް މުއިއްޒުގެ އެންގުމަށް ޕްރޮޖެކްޓްތައް ދީފައި ވަނީ ޤާނޫނާއި ޚިލާފަށް ކަމަށް ވާތީ އެ އެއްބަސްވުންތައް ބާތިލް ކުރުމަށް ސަރުކާރާއި އެކަމުގައި ބައިވެރިވާ ކުންފުނިތަކަށް ގޮވާލުން
2. ދައުލަތުގެ މުއައްސަސާތަކުން މި ޖަރީމާ ތަހުގީގުކުރުމަށް ގޮވާލުމުގެ އިތުރުން، އެ މައްސަލަ ތަހުގީގުކުރުމަށް ކަމާއި ބެހޭ އިދާރާތަކަށް އެ ޕާޓީގެ ފަރާތުން ހުށަހެޅުން
3. މާލިއްޔަތު ޤަވާއިދަށް ހުށަހެޅި ބަދަލު ބާތިލްކުރުމަށް އެމްޑީޕީ އިން ކޯޓަށް ހުށަހެޅުން
އެމްޑީޕީގެ ރޭގެ އެއްވުމުގެ ތެރެއިން -- ފޮޓޯ: ސަން
4. ދައުލަތަށް މި މުއާމަލާތުގެ ސަބަބުން ލިބިދާނެ އިއާދަ ނުކުރެވޭ ބޮޑު ގެއްލުމަކަށްޓަކާ މި މަޝްރޫޢުތަކަށް ފައިސާ ދޫކުރުން ހުއްޓުވުމަށް ކޯޓުގައި އަމުރަކަށް އެދުން
5. މި މައްސަލައިގައި މިހާރުން މިހާރަށް ފިޔަވަޅު ނާޅައިފި ނަމަ ދެން އަންނަ އެމްޑީޕީ ސަރުކާރެއްގައި މި މައްސަލަތައް ބަލާ ފިޔަވަޅު އެޅުން
6. މި މައްސަލަތައް ބެލުމަށް އިންކާރު ކުރާ މީހުން ދެން އުފެދޭ އެމްޑީޕީގެ ސަރުކާރެއްގައި މަޤާމުތަކުން ވަކިކޮށް، ރަސްމީ ވާޖިބް އަދާ ނުކުރި މައްސަލަ އާއި ކޮރަޕްޝަން އަށް މަގުފަހިވާ ގޮތަށް އަމަލު ކުރި މައްސަލަ ބަލާ ފިޔަވަޅު އެޅުން
އެމްޑީޕީން އެފަދައިން ނިންމިއިރު، މާލިއްޔަތުގެ ގަވާއިދަށް ގެނައި ބަދަލާއި އެކު، ކޮންޓްރެކްޓާ ފައިނޭންސް އުސޫލުން ހިންގުމަށް ޕްރައިވެޓް 53 ކުންފުންޏަކާއި އެކު 206 އެއްބަސްވުންތަކުގައި ސަރުކާރުން ސޮއިކޮށްފައިވަނީ މިދިޔަ ބުރާސްފަތި ދުވަހުއެވެ.
އެ ދުވަހު ސަރުކާރުން އެ ކުންފުނިތަކާއި އެކު ސޮއި ކުރި އެއްބަސްވުންތަކުގެ ޖުމްލަ އަގަކީ 2.7 ބިލިއަން ރުފިޔާއެވެ.
Advertisement
This content is created and paid for by advertisers and does not involve Voice Journalists
