ހުޅުމާލެ ފަޅުތެރޭގައި އޮތް ތެޔޮ ބޯޓެއްގައި މިއަދު ހިނދި އަލިފާނުގެ ހާދިސާގައި ބޯޓަށް ބޮޑެތި ގެއްލުންތަކެއް ލިބި ބިދޭސީއެއްގެ އަތްތިލަ ފިހިއްޖެއެވެ.
ފުލުހުން ބުނީ އަލިފާނުގެ މި ހާދިސާގެ މައުލޫމާތު ލިބިފައިވަނީ މެންދުރު 12:55 ހާއިރުކަމަށެވެ. ހާދިސާ ހިނގިތާ މާގިނައިތުތަކެއްނުވެ އެމްއެންޑީއެފްގެ ފަޔާޓީމުންވަނީ އަލިފާންގަނޑު ނިއްވާލާފައެވެ.
މި ހާދިސާގައި އަނިޔާވި ބަންގްލަދެޝް މީހާއަށް ވަނީ ހޮސްޕިޓަލަށް ގެންގޮސް ފަރުވާދީފައެވެ.
މީސް މީޑިއާގައި އާންމުވެފައިވާ ވީޑިއޯތަކާއި ފޮޓޯތަކުން ފެންނަ ގޮތުގައި މި ހާދިސާގައި ފުރަތަމަ އަލިފާންގަނޑު ރޯވެފައިވަނީ ބޯޓުގެ ގެގަނޑުގައެވެ. ބޯޓުގައި އަލިފާން ރޯވި ވަގުތު ތިން މީހުން އެ ބޯޓުގައި ތިބި މަންޒަރު ވީޑިއޯތަކުން ފެނެއެވެ. ނަމަވެސް ކުޑަ ޑިންގީއެއް ބޯޓާކައިރިކޮށް އެމީހުންވަނީ ސަލާމަތްހޯދާފައެވެ. ކުޑަ ވަގުތު ކޮޅެއްގެ ތެރޭގައި އަލިފާންގަނޑު ވަރަށް ބޮޑަށް ފެތުރި، މުޅި ބޯޓުގައި ވަނީ ރޯވެފައެވެ. އެ ބޯޓުގައި ރޯވިއިރު ކައިރީގައި ސަފާރީ ބޯޓުފަހަރާއި މަސްދޯނިތައް ހުރުމުން އަލިފާން ހިފުމާއެކު ކައިރީ ހުރި އުޅަނދުތައް ވަނީ ދުރަށް ޖައްސާފައެވެ.
އަލިފާނުގެ ހާދިސާ ހިނގީ ސީދާ ކޮން ސަބަބަކާ ހުރެ ކަމެއް އަދި ސާފުވެފައެއް ނުވެއެވެ. ފުލުހުން މައުލޫމާތު ދޭގޮތުގައި މި މައްސަލަ ދަނީ އިތުރަށް ތަހުގީގުކުރަމުންނެވެ.
Advertisement
This content is created and paid for by advertisers and does not involve Voice Journalists
