މިއަދުން ފެށިގެން ވަންގަވް މެދުވެރިކޮށް އައިވީއެފް ފަރުވާއަސް އެދި ހުށަހެޅޭނޭކަމަށް ނެޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) އިން ބުނެފިއެވެ.
އެންސްޕާއިން ބުނީ https://one.gov.mv ޕޯޓަލް މެދުވެރިކޮށް މިއަދުން ފެށިގެން އައިވީއެފް ފަރުވާ ހޯދުމަށް އެދޭ ފަރާތްތަކަށް އެކަމަށްއެދި ފޯމް ހުށަހެޅުމުގެ ފުރުސަތު ހުޅުވާލާފައިވާކަމަށެވެ. އެންސްޕާއިން އައިވީއެފް ފަރުވާއަށް ހުޅުވާލާފައިވަނީ ދައުލަތުގެ ފަރޓިލިޓީ ކެއަރ ފަންޑް މެދުވެރިކޮށެވެ.
އެންސްޕާއިން ވަނީ މިފަހަރު 50 ފަރާތަކަށް އައިވީއެފް ފަރުވާގެ ފުރުސަތު ދިނުމަށް ނިންމާފައިވާކަން ހާމަކޮށްފައެވެ. އައިވީއެފް ފަރުވާއަށް އެދި ހުށަހެޅޭނީ މިއަދުން ފެށިގެން ޑިސެންބަރު 20 ވަނަ ދުވަހުގެ 14:00 ގެ ނިޔަލަށެވެ. މާލީ ފުދުންތެރިކަން ނެތް މީހުންނަށް ދައުލަތުގެ ޚަރަދުގައި އައިވީއެފް ހެދުމުގެ އިންތިޒާމު ފަހިކޮށްދިނީ މިދިޔަ އަހަރުގެ ކުރީކޮޅުގައެވެ. އެގޮތުން، ސަރުކާރުގެ ޚަރަދުގައި އައިވީއެފް ފަރުވާ ދިނުމަށް ހަމަޖެހިފައިވާ ފުރަތަމަ ބެޗުގައި ހިމެނޭ 100 މީހަކަށް ވަނީ 30 މިލިއަން ރުފިޔާ ކަނޑައަޅާފައެވެ.
އެންސްޕާ އިން މި މަހު އާންމުކުރި ތަފާސްހިސާބުގައިވާ ގޮތުން، ފާޓިލިޓީ ކެއާ ފަންޑު މެދުވެރިކޮށް މި ދެ އަހަރުގެ ތެރޭގައި 93 މީހަކަށް އައިވީއެފް ހެދުމަށް އެހީތެރިވެދީފައިވެއެވެ. އޭގެ ތެރެއިން 23 މީހުން ފަރުވާ ކާމިޔާބުކޮށްފައިވެއެވެ. އެންމެ ފުރަތަމަ އައިވީއެފް ފަރުވާގެ އެހީއަށް އެދުނު 215 ދެމަފިރިންގެ ތެރެއިން ޝަރުތު ހަމަވީ 63 ދެމަފިރިންނެވެ.
Advertisement
This content is created and paid for by advertisers and does not involve Voice Journalists
