އިނގިރޭސި ޕްރިމިއާ ލީގްގައި ރޭ ފޮރެސްޓް އަތުން ލިވަޕޫލް ބަލިވެ، އެޓީމްގެ ކޯޗް އާނޭ ސްލޮޓް ދެން އިތުރަށް ލިވަޕޫލްގައި ހުންނާނޭކަމާމެދު ސުވާލު އުފެދިއްޖެއެވެ.
ޕްރިމިއާ ލީގްގައި މި ސީޒަނުގައި ލިވަޕޫލް ފެންނިގެންގޮސްފައިވަނީ ވަރަށް ބަލިކަށިކޮށެވެ. ލީގްގައި މިހާތަނަށް ކުޅުނު 12 މެޗްގެ ތެރެއިން އެޓީމް ވަނީ 6 މެޗުން ބަލިވެފައެވެ. ލިވަޕޫލްގެ އެންފީލްޑްގައި ރޭ ފޮރެސްޓް އަތުން އެޓީމް ބަލިވީ 0-3 ގެ ނަތީޖާއަކުންނެވެ.
މެޗްގައި ފޮރެސްޓުގެ ފުރަތަމަ ގޯލް 33 ވަނަ މިނެޓް ތެރޭގައި މުރިލޯ ކާމިޔާބުކޮށްދިން އިރު ދެވަނަ ލަނޑު ޖަހައިދިނީ ސަވޯނާއެވެ. އަދި ތިންވަނަ ލަނޑު 78 ވަނަ މިނެޓް ތެރޭގައި ކާމިޔާބުކޮށްދިނީ ވައިޓެވެ.
މެޗަށްފަހު ލިވަޕޫލްގެ ކޯޗް އާނޭ ސްލޮޓްވަނީ މެޗުން ބަލިވުމުގެ ޒިންމާ އޭނާ އުފުލާކަމަށް ބުނެފައެވެ. އެގޮތުން މެޗްގައި އޭނާ ޕްލޭންކުރި ގޭމް ކާމިޔާބު ނުވާކަން ފާހަގަކޮށް ކޯޗް ވަނީ ބަލިވުމުގެ ޒިންމާ ނަގާފައެވެ. ލިވަޕޫލް ފޯމް ގެއްލިފައިވާއިރު، ގާތްގާތުގައި ގިނަ މެޗްތަތަކުން ބަލިވުމުން ކޯޗް މަގާމުގައި ދެމިހުންނާނެތޯވެސް މިހާރު ވަނީ ސުވާލު އުފެދިފައެވެ.
ރޭގެ މެޗް ލިވަޕޫލް ޑޮމިނޭޓްކުރިނަމަވެސް އެޓީމަށް ލަނޑެއް ކާމިޔާބުކުރެވޭ ގޮތެއް ނުވިއެވެ. މެޗްގައި ގޯލަށް އަމާޒުކޮށް ގިނަ ހަމަލާތައް އުފައްދާފައިވަނީވެސް ފޮރެސްޓުންނެވެ.
ރޭގެ މެޗުން ބަލިވުމާއެކު ލިވަޕޫލް ވަނީ ތާވަލްގެ 11 ވަނައަށް ވެއްޓީފައެވެ. ލީގްގައި މިހާތަނަށް ކުޅުނު 12 މެޗުން އެޓީމަށް ލިބިފައިވަނީ 18 ޕޮއިންޓެވެ. މެޗުން މޮޅުވި ފޮރެސްޓު އުޅެނީ 12 ޕޮއިންޓާއެކު ތާވަލްގެ 16 ވަނާގައެވެ.
Advertisement
This content is created and paid for by advertisers and does not involve Voice Journalists
