ވިލިމާލޭގައި 300 ހައުސިން ޔުނިޓް އިމާރާތް ކުރައްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިރޭ ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ ވިލިމާލެ ރައްޔިތުންނާއި މިރޭ ބައްދަލު ކުރެއްވުމަށް މިރޭ ބޭއްވި ބައްދަލްވުމުގައި ވާހަކަފުޅު ދައްކަވަމުންނެވެ. ހެޔޮ އަގުގައި އާންމުންނަށް ގެދޮރުވެރިކަން ފޯރުކޮށްދިނުމުގެ ގޮތުން ރާއްޖޭގެ ބޭންކުތަކުން އަޅަން ކަނޑައަޅައިފައިވާ ހައުސިން ޔުނިޓުތަކުގެ ތެރެއިން ބީއެމްއެލުން އަޅާ 3000 ޔުނިޓްގެ ތެރެއިން 300 ހައުސިން ޔުނިޓް އަޅާނީ ވިލިމާލޭގައި ކަމަށެވެ.

ރައީސް ވިދާޅުވީ އެ ހައުސިން ޔުނިޓްތައް ހާއްސަ ކުރާނީ ވިލިމާލޭގައި ދިރިއުޅޭ ރައްޔިތުންނަށް ކަމަށެވެ.

"މި 300 ހައުސިން ޔުނިޓް މި ވިލިމާލޭގައި އުޅޭ ރައްޔިތުންނަށް ޚާއްސަ ކުރާނީ," ރައީސް ވިދާޅުވި އެވެ.

ސަރުކާރުން ބުނި ގޮތުގައި ވިލިމާލޭގައި މިވަގުތު އިމާރާތް ކުރެވެން އޮތީ 300 ހައުސިން ޔުނިޓެވެ. އެހެން ކަމުން މިއީ މިވަގުތަށް ނެގެން އޮތް އެންމެ ގިނަ އަދަދެވެ. އެ މަސައްކަތް ފެށުމަށް މި އަހަރުގެ ތެރޭގައި ކޮންޓްރެކްޓަރަކާއި ހަވާލު ކުރާނެ ކަަމަށްވެސް ސަރުކާރުން ބުނެ އެވެ.