އޭޝިއާ ސަރަހައްދުގައި އުފެދިފައިވާ "ދިޓުވާ" ތޫފާނުގެ މިޝްރާބް މިހާރުހުރީ ރާއްޖެއާ ދުރަށްކަމަށް މޯލްޑިވްސް މީޓިއޮލޮޖިކަލް ސެންޓަރުން ބުނެފިއެވެ.
މެޓް އޮފީހުން ބުނީ ދިޓުވާ ތޫފާން މިހާރު ހުރީ ހއ.ތުރާކުނުގެ އިރުއުތުރުން ގާތްގަނޑަކަށް 875 ކިލޯމީޓަރު ދުރުން ސްރީލަންކާގެ އުތުރު އައްސޭރިފަށާއި ބޭ އޮފް ބެންގޯލްގެ ހުޅަނގު ދެކުނު ސަރަހައްދުގައެވެ.
މި ތޫފާން ދަތުރުކުރާނޭކަމަށް ލަފާކުރެވެނީ އުތުރު ހުޅަނގުއުތުރަށް ރާއްޖެއާ ދުރަށްކަމަށް މެޓް އޮފީހުން ބުންޏެވެ.
މި ތޫފާނުގެ މިޝްރާބް މިހާރު ހުރިގޮތަށް ބަލާއިރު، މާދަމާގެ ހެނދުނުގެ ވަގުތެއްގައި އިންޑިއާގެ އުތުރު ތަމިލްނާޑޫ، ޕޫޑޫޗެރީ އަދި އަންދުރަ ޕްރަދޭޝްގެ ދެކުނު އައްސޭރިފަށަށް ޖެހޭނޭކަމަށް ވަނީ ލަފާކޮށްފައެވެ. މެޓް އޮފީހުން ބުނީ މި ތޫފާނާ ގުޅިގެން ކުރިއަށްއޮތް 24 ގަޑިއިރުވެސް ރާއްޖޭގެ މޫސުން ގޯސްވާނޭކަމަށެވެ. ހާއްސަ ގޮތެއްގައި މެދުރާއްޖެތެރޭގެ އެކި ހިސާބުތަކަށާއި ދެކުނުގެ ބައެއް އަތޮޅުތަކަށް ވިއްސާރަކުރުމާއެކު ގުގުރާނޭކަމަށް ލަފާކުރެވޭކަމަށް މެޓް އޮފީހުން ވަނީ ބުނެފައެވެ.
ތޫފާން ދިޓުވާގެ ސަބަބުން އެންމެބޮޑު ގެއްލުމެއް ވެފައިވަނީ އަވައްޓެރި ސްރީލަންކާއަށެވެ.
Advertisement
This content is created and paid for by advertisers and does not involve Voice Journalists
