ސްރީލަންކާއަށް އެރި ތޫފާނާއި ބޯކޮށް ވާރޭވެހުމާ ގުޅިގެން އެޤައުމަށް ލިބުނު ގެއްލުންތަކުން އަރައިގަތުމަށް ކުރަމުްނގެންދާ މަސައްކަތްތަކަށް ލަންކާ ޤައުމީ ކްރިކެޓް ޓީމުގެ ފަރާތުން 300 މިލިއަން ރުޕީސް ހަދިޔާކޮށްފިއެވެ.

މިކަމާ ގުޅިގެން ސްރީލަންކާގެ ޤައުމީ ކްރިކެޓް ޓީމުން ބުނީ، ގެއްލުން ލިބުނު ފަރާތްތަކަށް އެހީވުމަށް ސަރުކާރުން ގާއިމްކޮށްފައިވާ ރިބިލްޑިންގ ސްރީލަންކާ ފަންޑަށް 300 މިލިއަން ރުޕީސް ހަދިޔާކޮށްފައިވާކަމަށެވެ. މި ފައިސާ ހަދިޔާކުރަން ނިންމީ ސްރީލަންކާ ކްރިކެޓްގެ ރައީސް ޝައްމި ސިލްވާ އަދި ބޯޑުގެ މަޝްވަރާއަށްފަހުކަމަށް ލަންކާ ކްރިކެޓުން ބުންޏެވެ. 

ސްރީލަންކާ ފައިސާގެ 300 މިލިއަން ރުޕީސް އަކީ ގާތްގަނޑަކަށް 971 ހާސް އެމެރިކާ ޑޮލަރެވެ. ސްރީލަންކާއަށް ކުރިމަތިވި ގުދުރަތީ ކާރިސާގައި އެންމެ އަވަހަށް އެހީތެރިކަން ދޭން ނިންމި އެޤައުމުގެ ފުރަތަމަ އެއް މުއައްސަސާއަކީވެސް ލަންކާ ކްރިކެޓް ޓީމެވެ. ޕާކިސްތާނުގައި މުބާރާތެއް ކުޅެންގޮސް މިވަގުތު ތިބި ލަންކާ ކްރިކެޓް ޓީމުން ވަނީ، ޕާކިސްތާނު ޓްއާއިން ލިބޭ ހުރިހާ ފައިސާއެއް   ހާލުގައި ޖެހުނު ފަރާތްތަކަށް ދިނުމަށް ނިންމާފައެވެ.

މިކަމާ ގުޅޭގޮތުން ފޭސްބުކްގައި ކުރި ޕޯސްޓެއްގައި ލަންކާ ޤައުމީޓީމްގެ ކޯޗް އަދި ކްރިކެޓް ލެޖެންޑް ސަނަތު ޖަޔަސޫރިއާ ބުނެފައިވަނީ، ލަންކާ ކްރިކެޓް ޓީމްގެ ކުޅުންތެރިންނާ އޮފިޝަލުންތިބީ ހާލުގައި ޖެހުނު ފަރާތްތަކާއި އަދި އެފަރާތްތަކަށް އެހީވުމަށް އެކިގޮތްގޮތުން މަސައްކަތްކުރަމުންދާ ޓީމްތަކާއެކުގައިކަމަށެވެ.