ސްރީ ލަންކާއަށް އެރި ތޫފާނާ ގުޅިގެން މަރުވި މީހުންގެ އަދަދު 600 އަށް ވުރެ މަތިކަމަށް ރިޕޯޓުކޮށްފިއެވެ.
އެގައުމުގެ ޑިޒާސްޓަރ މެނޭޖްމަންޓް ސެންޓަރ (ޑީއެމްސީ) އިން އިއްޔެ ބުނެފައިވަނީ، މިހާތަނަށް މި ތޫފާނުގެ ސަބަބުން 607 މީހުންގެ ފުރާނަ ގެއްލިފައިވާކަން ޔަގީންކުރެވިފައިވާކަމަށެވެ. އަދި 214 މީހުން ގެއްލިފައިވާކަމަށް މައުލޫމާތު ލިބިފައިވާކަމަށްވެސް ވަނީ ބުނެފައެވެ. ތޫފާނުގައި ލިބުނު ގެއްލުންތަކުގެ އަސަރު ގައުމުގެ 25 ސަރަހައްދެއްގެ 586,464 ގޭބިސީއަކުން، ޖުމުލަ 2,082,195 މީހުންނަށް ވަނީ ކޮށްފައެވެ.
މި ހާދިސާތަކާ ގުޅިގެން އެންމެ ގިނަ މީހުން މަރުވެފައިވަނީ ކެންޑީ ޑިސްޓްރިކްޓުންނެވެ. އެއީ ޖުމުލަ 232 މީހުންނެވެ. މީގެ އިތުރުން ނޫރަލިއާއިން 89 މީހުން، ބަޑުއްލާ ޑިސްޓްރިކްޓުން 83 މީހުން، ކުރުނުގަލާ ޑިސްޓްރިކްޓުން 61 މީހުން، އަދި ކޭގާލޭ ޑިސްޓްރިކްޓުން 30 މީހުން މަރުވެފައިވާ ކަމަށް ވަނީ ރިޕޯޓްކޮށްފައެވެ. މީގެ އިތުރުންވެސް އެކި އަވަށްތަކުން ވަނީ ގިނަ ބައެއްގެ ފުރާނަ ގެއްލިފައެވެ.
ތޫފާން ދިތުވާގެ ނަމުން ނަން ދެވިފައިވާ މި ތޫފާނަކީ ލަންކާގެ ތާރީހުގައިވެސް އެގައުމަށް ކުރިމަތިވި އެންމެ ނުރައްކާތެރި ތޫފާނެއެވެ. އެތައް ބައެއްގެ ފުރާނަ ގެއްލި އިގްތިސާދީ ގޮތުންވެސް އެ ގައުމު ވަނީ އަނދަވަޅަކަށް ވެއްޓިފައެވެ.
Advertisement
This content is created and paid for by advertisers and does not involve Voice Journalists
