ތޮއްޑޫ ލޯކަލް އޮތޯރިޓީ ކުންފުންޏަށް އަހަރެއްވެގެން ދިޔައިރުވެސް، ކައުންސިލް އިދާރާއަށް ބަރޯސާނުވެ ކުންފުންޏަށް ލިބޭ އެއްޗަކުން ކުންފުނި ހިންގުމުގެ ނިޒާމެއް ގާއިމްކޮށްފައި ނުވާކަމަށް އޮޑިޓަރ ޖެނެރަލް ބުނެފިއެވެ.

އޮޑިޓަރ ޖެނަރަލް ނެރުއްވާފައިވާ އއ.ތޮއްޑޫ ލޯކަލް އޮތޯރިޓީ ކޮމްޕެނީ ލިމިޓެޑްގެ 2023 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓްގައި ބުނެފައިވަނީ، ތޮއްޑޫ ލޯކަލް އޮތޯރިޓީގެ މާލީބަޔާން ތައްޔާރުނުކުރުމުން މާލީ ހާލަތު ވަޒަންކުރެވޭނެ އަސާސެއް ނެތްކަމަށެވެ. އަދި ކުންފުނީގެ ހިންގުން ވަނީ ވަރަށްބޮޑަށް ބޮއްސުންލާފައި ކަމަށް އެ ރިޕޯޓްގައި ވަނީ ފާހަގަކޮށްފައވެެ.

ކުންފުނީގެ ހިންގުން ވަރަށް ދޯދިޔާކަން ފާހަގަކުރައްވަމުން އޮޑިޓް ރިޕޯޓްގައި ބުނެފައިވަނި، ތޮއްޑޫ ލޯކަލް އޮތޯރިޓީ ކުންފުނި މާލީގޮތުން ކުރިއަށްގެންދިއުމަށް ކައުންސިލްގެ އިދާރާއިން ގިނަ އަދަދެއްގެ ފައިސާ އެކުންފުންޏަށް ދެމުން ގޮސްފައިވާކަމަށެވެ. ކުންފުނި ދެމެހެއްޓުމަށްޓަކައި ކުންފުނީގެ އޮޕަރޭޝަންތަކުން ހިންގޭވަރަށް އާމްދަނީއެއް ލިބިގެންދިއުމަކީ މުހިންމުކަމެއްކަން ފާހަގަކުރަމުން އޮޑިޓް ރިޕޯޓްގައި ބުނެފައިވަނީ، 2023 ވަނަ އަހަރުން ފެށިގެން ނިމިގެންދިޔަ 2024 ވަނަ އަހަރު ކުންފުންޏަށް 5.3 މިލިއަން ރުފިޔާ ލިބުނުއިރު މީގެ ތެރެއިން 2 ލައްކަ ރުފިޔާއަކީ ކައުންސިލް އިދާރާއިން ލިބިފައިވާ ފައިސާކަމަށެވެ. 

އޮޑިޓް ރިޕޯޓްގައި ބުނެފައިވަނީ ތޮއްޑޫ ލޯކަލް އޮތޯރިޓީ ކުންފުންޏަށް އާމްދަނީ ހޯދުމުގެ ގޮތުން ގަނެފައިވާ ބައެއް ތަކެތި ވިއްކާފައިވަނީ ވިޔަފާރި ކުރުިއަށްގެންދެވޭ ވަރަށްވުރެ ކުޑަ މާޖިންއެއް ލައިގެންކަމަށެވެ. މީގެ އިތުރުން ކްރެޑިޓް ދޫކުރުމުގެ އުސޫލެއްނެތި މުއައްޒަފުންގެ މަސްލަހަތު އޮންނަ ތަންތަނަށް ކްރެޑިޓަށް ތަކެތި ދޫކޮށްފައިވާކަމަށް ވަނީ ބުނެފައެވެ. 

އަދި ކުންފުނިން ވިއްކުމަށް ގެނައި ކޮންސްޓްރަކްޝަން މެޓީލިއަލްސްތައް މަގުމަތީ ބެހެއްޓުމާއި، ކުންފުންޏަށް ޕިކަޕެއް ގަތުމަށް ހަރަދުވާނެ ފައިސާ އާއި ގާތްކުރާ އަދަދަކަށް ޕިކަޕެއް ކުއްޔަށް ނެގުމަށް ހަރަދުކޮށްފައިވާކަން ވަނީ ފާހަގަކުރައްވާފައެވެ. 

މީގެ އިތުރުން ކުންފުންޏަށް ވިޔަފާރިއާ މާލީ ލަފާ ދިނުމުގެ ކޮންސަލްޓެންސީ އެއްބަސްވުމާއި އެއްގޮތަށް ހިދުމަތް ލިބުނުކަން ލިޔުމުން އެނގެން ނެތީސް ފައިސާ ހަރަދުކޮށްފައިވުމާއި، ކުންފުނިން ބަލައިގަންނަންޖެހޭ ފައިސާ ކުންފުނީގެ މުއައްޒަފެއްގެ ޕާސަނަލް އެކައުންޓަށް ޖަމާކުރުމަށްފަހު ކުންފުނީގެ އެކައުންޓަށް ޓްރާންސްފާ ކޮށްފައިވާކަމަށް އޮޑިޓް ރިޕޯޓްގައި ވަނީ ބުނެފައެވެ. އަދި ހަމަ އެހެންމެ ކުންފުނީގެ ބޯޑު މެމްބަރުން، ކުންފުނީގެ ދުވަހުްނ ދުވަހަށް ކުރަންޖެހޭ މަސައްކަތްތައް ކުރާގޮތަށް  ބޯޑުން ނިންމައި މުސާރަ ނަގަމުންދިޔަކަންވެސް ވަނީ ފާހަގަކޮށްފައެވެ.

ކައުންސިލްތަކުން ލޯކަލް އޮތޯރިޓީ ކުންފުނި އުފެއްދުމާއި، އަމިއްލަ ފަރާތްތަކާއެކު ވިޔަފާރިކުރުމާބެހޭ ގަވާއިދުގައި ބުނާގޮތުން މިގޮތަށް އުފައްދާ ކޮންމެ ކުންފުންޏެއްވެސް މެނޭޖިންގ ޑިރެކްޓަރު ފިޔަވައި އެހެން ހުރިހާ ޑިރެކްޓަރުންނަކީ ކުންފުނީގެ ވަޒީފާއެއް އަދާކުރާ، ދުވަހުން ދުވަހަށް އުފުލަންޖެހޭ އެއްވެސް ޒިންމާއެއް ކަނޑައެޅިފައިވާ ޑިރެކްޓަރަކަށް ވެގެން ނުވާނެއެވެ.